MOS ASPERA DIAS DIFISILES

March 28, 2018

Los tres primeros mezes de2018  pasaron bien en muestro payis .  Israel ekonomikamente esta avansado i munchos de los payises  miembros komo mozotros del OECD se enselan de saver esto. Eyos se enselan especialmente de la  kuantitad muy basha  de los sin echos , ke no depasa los 4,3 porsiento de los demandadores de lavoro en Israel. Por kontra en el Merkado Evropeo esta demanda se aserka de  los 10 porsiento.  Israel eksporto mas de 100 miliardas de dólares de productos industriales i teknolojia en 2017. Esperamos ke esta situasion kontinuera en los anyos vinideros visto ke vamos a empesar serka en  tres anyos a eksportar gaz natural, koza ke mos enforsara no solo del punto benefisio si no ke del punto stratejiko. Las relasyones kon los grandes potensias mondialas son buenas i la administrasion de Los Estados Unidos mos esta apuyando sin falda en el kampo enternasyonal . El prezidente Trump  mos estima a bastante i se konsiente komo el protektor del estado israeliano.  Por kontra Israel es mal visto en las Nasiones Unidas porke serka 50 payises musulmanos en grande partida ovran kontra el, miran de arebasharlo i de kondanarlo  por los derechos umanos non respektados(!). No pasa anyo ke Israel no es kondanado de una manera u otra. Antes kuantos días 5 muevas rezolusyones fueron votadas kontra eya en Genevra , kuando una sola rezolusyon kontra  la Siria onde las matansinas del pueblo sivil kontinua dizde siete anyos.  Si a esto ajustamos la ipokrizia de la Union Evropea enverso Israel ke  se kontenta de kondanar los aktos teroristos palestianos  kon media boka i ayuda la administrasion de Abbas el sanginaryo, kon milyones de euros para ke sean dados a los teroristas kondanados a la prisión, a no achetar la realita de fakto ke Yerushalayim es la kapitala de Israel i mas inimistades semejantes en diferentes kampos de las relasiones kon muestro payis..

Malgrado todo esto la diplomasiya israeliana supo i save komo rijir la situasyon perikoloza en la kuala mos topamos oy en dia . El Medio Oriente  a la eksepsion de Israel en jeneral esta buyendo. Los konfliktos ke egzisten al doredor de muestro payis son munchos i en estos momentos estan al pino. En la Siria  los kampos ke se konfrontan son múltiplos, grasias al apoyo i a la prezensia de la Rusia , del Iran i de su proksi el Hizbullah libanezo  presentes en este payis arabo Asad dia i noche mira de guadrar su pueder mismo en masakrando su pueblo.  Los Estados Unidos sin anonsarlo aviertamente están presentes para sostener a los Kurdes de la Siria, donde el buto es de establisir finalmente un payis otonomo sovre el norte de la Siria i del Irak.  La Turkia del espanto ke el PKK aliado de los kurdes sirianos ke lucha para kontrolar el sud este, tierra kurda de la Turkia , desidio de okupar kon la permisión de la Rusia i el apoyo del Iran una partida de la Siria del norte i ansina  repushar los kurdes  de esta zona.  Estas todas luchas son organizadas por estos estados ajenos kon la kontribusyon  de las diferentes fuersas armadas  otoktonas formadas durante los siete anyos de guerra interna.  Los amerikanos van kon los kurdes, los turkos van kon los viejos miembros del Isis ke se azen pagar para matar a los Kurdes ke son sus inimigos, las fuersas independientes ke luchan kon el pueder de Asad i sus aliados las fuersas alaouites, sovre la direksyon de los revolusyonarios iranianos i  sus proksi Hizbullah van periendo kada dia el tereno konkisado los anyos pasados. Se puede pretender ke las grande potensias mondialas presentes en el tereno deven de ser atentos a no entrar en konflikto direkto.  Esto es la mas grande preokupasion de Israel. Imajinavos ke la Turkia i los Estados Unidos dos aliados de anyos i miembros del Nato se toparan frente kon frente.  Bastara un chiko preteksto para ke el lugar se enflame. El mismo espanto egziste entre la Rusia i los Estados Unidos. Basta ke Asad empleye kon negra intinsyon  bombas a gaz, para ke el imprevisible  Trump dea el orden  de atakar Damas a sus fuersas presentes en Siria. Moskova no  puedera  no ayudar a su aliado Asad i dunke konfrontar Los Estados Unidos.  La rumor dize ke los 3 mezes a vinir están yenos de perikolos en esta parte del mundo. Si ajustamos a esto el konflikto atomiko del Iran, la guerra entre ermanos en el Yemen ke toka  la Arabia Seudita i otros konfliktos entre mizmo los payises arabos ,  Israel se puede toparse en medio del fuego sin kererlo. Muestros dirijentes deven de ser akavidozos de guadrar el statuto ke tuvieron los dalkavos 7 anyos, todo en ayudando los druzes sirianos a sobrebivir  en sus teritorios vizinos del Golan. La rumor dize  además ke los  amerikanos kererian salir de la zona en abandonando sus grande baza de Incirlik en Turkia i de sus baza ke se topa en el Katar  ke sirvieron anyos a protejar los kampos de petrol de la rejyon. Se pretende en Israel ke los Amerikanos darán todo el apoyo demenesterozo para ke la Arabia Seudita i Israel tengan un dialogo de entendimiento en estas kestyones.  Koza ke avrara el kamino de rekonosiensa mutual  en el futuro.  Asperaremos kon pasensia estos evenimintos kon sangre fría i rogaremos a no ser forsados de partisipar a una guerra.

Fiestamos en estos días muestra salida de Ayifto verso la  libertad, evenimiento viejo de miles de anyos.  Israel es i será la patria del pueblo djudio  puedera unir en su  seno a toda la djuderia kon pas i libertad, kon la esperansa  de tener días sin guerras i matansinas.

  Keridos lektores vos auguro Pessah alegre i kasher.

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon