FONDASION DE LA KAZA DE MUESTRAS PALAVRAS

February 28, 2018

 

La semana pasada en la sede de la  REAL AKADEMIA ESPANYOLA (RAE) en Madrid tuvo lugar la konvension de la lingua Djudeoespanyola (Ladino),organizada kon el ayudo de la Fondasion Hispanodjudia. Durante dos dias los akademikos israelianos nominados por la RAE komo korespondientes de la Akademia i kon la partisipasion  de los miembros de la Autoridad Nasionala del Ladino i de su kultura(ANL) se desidio de establisir una Akademia  nasionala del Ladino en Israel.  Partisiparon  al evenimiento , ofisialamente invitados , la Asosiasion de Akademias de la lingua española (ASALE), el Instituto Salti para el estudio del Ladino de la Universitad Bar Ilan,  la Asosiasion Prezidente Navon i la CSIC de Madrid.  Kon sierta solemnidad el direktor de la RAE, Dario Villanueva anunsio este nasimiento, un muevo miembro en la famiya de la lingua kastelyana.  La Akademia del Ladino azera parte de la Asale  ke representa  23 akademias de la lingua espanyola en el mundo de 22 payizes, espanyol avlando i de los Estados Unidos, payis onde la lingua nasionala es el Inglez. Los Estados Unidos tomando en konsiderasyon los 50 miliones de ispanikos ke biven en eya rekonosio a su Akademia espanyola komo entitad privada.  Koza semejante ke servirá de egzemplo en Israel. No mos alvidaremos ke las linguas ofisialas en Israel son dos: el Ebreo i el Arabo. A este fin egzisten 2 akademias en el payis i se pensa ke será neseserio de formular por las otoridades israelianas un statuto a esta mueva entitad i de apoyarla materialmente. En la konvension se desidio ke la ANL enkavesada por  Tamar Alexander i Shmuel Refael, miembros del egzekutivo de la ANL i koordinatores de la Akademia de Ladino, se okuparan a presentar al ministerio de la kultura israeliano el proyekto de la Akademia.  Se azera en los tiempos vinideros un lavoro  bastante intensivo i delikado en teniendo  en konsiderasyon munchos faktores administrativos, sentimentales i juridikos de la prosedura.  Les oguro buena reushita i los apoyo de todo mi korason.

Israel oy en dia es visto por el mundo ispaniko komo reprezentante de mas de 500 miliyones de almas komo un payis kon el kual es inevitable tener buenas relasiones  i dezvelopar el negosio, la kultura , el turizmo i mas.  Israel es el payis de las inovasyones modernas i el inkubator de las teknolojias del venteunien sieglo.   En paralel a este fin las otoridades israelianas tienen el intereso  de dezvelopar la kultura entre esta grande famiya ispanika i de mirar a ke muestro payis seya inkorporado en eya a traverso la Akademia del Ladino.  Yo digo ke los ladino -avlantes de Israel deven de apoyar kon determinasyon i fuerza a este proyekto. No pasara dia sin ke kada uno de mozotros no se sientara responsable de esta oportunidad unika ke mos se prezenta.

De otra parte en el momento ke la Akademia de Ladino empesara a lavorar será nesesario de nominar un komite egzekutivo independiente, el kual devra nominar kon el tiempo muevos miembros  nasyonales de la Akademia,  por la simple razon ke devemos de tener bastante miembros para responder a los lavoros ke serán programados.  El lavoro el mas importante de revitalizar la lingua  va ser el diksonario  elektroniko. Lavoro ke tomara muncho tiempo.  Penso ke los miembros espesialistos del idioma, toparan las repuestas djustas komo eskrivirlo, su alfabeto adaptado a los manaderos elektronikos, dar fin a la polemika de anyos konsernando su nombre, malgrado ke egziste un modus vivendi de yamarla Djudeoespanyol o Ladino, de krear para ke la lingua kede biva  kon muevas palavras  de ayer i oy, establir una gramatika adekuata i de apoyar el lavoro literario.  No ay duvda la Asale komo la Real Akademia mos ayudara  kon sus eksperiensas  a ke seyamos perfektamente  djustos en muestros futuros lavoros. .

Komo disho Shmuel Refael durante la konvension ,”Lo importante es uzar la lingua komo símbolo de la muestra identifikasyon i reprezentasyon” i  Tamar Alexander  adjusto ke  "muestro prinsipal lavoro en la ANL es de mirar de ambezar el ladino a los ninyos  lo mas presto posible”.  En establisiendo la Akademia, kon el apoyo de las Universitades del Estado será mas fasil de formar profesores de muestra lingua i ansina de introduizirla  en los liseos del payis.

La Akademia del Ladino, si todo ira bien, se fondara i  empesara a lavorar en 2019.  Sera nominada  la 24ene Akademia de la Union Asale.  Ken de mozotros de sonyava de un semejante avenimiento?  Ay 100 aniyos ke se lucha para sovreguadrar muestro idioma, nunka no mos akodrimos ke muestra lingua es tanto biva,  komo oy. No pasa dia ke en una de las  sivdades del payis la djente  empese a avlar el ladino o se aune en sirkolos privados para praktikar la lingua. No ay semana ke un konserto de kantikas no se organize. Mizmo festivales no abastan a dar satisfaksion a la demanda del publiko ke kere sintir kantar en ladino.

 

 

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon