La nueva administrasyon en la Itahdut


El evenimyento de esta semana son las eleksyones de la nueva Moatsa ( asemblea de elijidos) de la organizasyon de Turkanos en Israel ( Itahdut Yotse Turkiya). De esta asamblea se formara la presidencia y la administrasyon de la organizasyon.

Un jesto muy apropeiado fue la ekspozisyon de las fotografías de los presidentes pasados. Porke eyos representan la buena voluntad y el sakrifisyo de los ke se okuparon de la Aliya, de los menesteres finansiarios, kulturales, sosiales durante 60 anyos ( en su forma de oy) y 80 anyos kuando fundaron el Irgun Ole Turkiya.

Los nombres de los presidentes, empesando kon Henri Peretz, Yehuda Adiri, Shabtai Leon, Ishak Misistrano, Marko Menahem Eskenazi, Ishak Kohen, Sami Day, Yakup Barokas, Niso Kaneti, Moreno Margunato, Momo Uzsinay y últimamente de Zali de Toledo nos embezan kualo es la empatiya y el dezeo de ser útil a la kollektividad.

Ma ay otros nombres ke sirvieron anyos enteros komo vice presidentes aktivos y efektivos : Niso Guvenis, y presidentes de la Moatsa en el pasado, Dr. Selim Salti siendo el ultmo.

Zali de Toledo es la prima mujer ke okupo el posto de presidente, después de aver servido la kultura muzikala de Israel y su Orkestra filarmonika mundialmente konosida, sigyidos por un servisyo diplomatiko kultural en la Embasada de Israel en Turkiya. Eya tuvo ke dar la importansa a la kultura de los Judios de Turkiya, todo en no abandonando los esforsos malgrado las difikultades :pokos números en la aliya y las malas relasyones kon la Turkiya.

Agora tenemos un trokamiento importante en la estruktura de la komunidad de Judios de Turkiya en Israel : Sienes de jóvenes intellektuales, kon titolos universitarios y kon kriaturas chikas izyeron sus aliya. Eyos serán tanbien entre los elektores y eligidos ke formaran la nueva administrasyon.

El mundo moderno esta preferando el dinmizmo de los dirijentes mas jóvenes, a lo ke yamavan antes “eksperiensia”. El joven es el ke es kapache de traer trokamientos. Solo ke tenemos el derecho de konsejarle de servirse siempre de los mas eksperimentados para mijor reushir.

Kualo se espera de la nueva administrasyon? La aliya de Turkiya es la primera obligasyon : Bien entendido ke aliya ekzije el mijor akolyo a los ke vinieron a una nueva vida : la lingua, el echo (parnasa), la kaza, las eskolas de las kriaturas, los menesteres de salud, los menesteres sosiales y kulturales. El governo ayuda, ma ken es el ke no konose la diffikultad del nuevo ole ke no siempre esta avizado de sus derechos y ke no save eksplikarse?.

La Itahdut deve de ser sus adreso, mas ke antes y de una manera mas efisyente. Para esto ay ke movilizar voluntarios entre los ke vinimos mas antes.

La Turkiya troko: elementos komunes entre los Judios komo lingua, kartieres donde biven, la influenza de los evenimientos politikos trokaron enteramente. La prensa Turka esta yena de novedades y artikolos ke estrompean la realidad. Todo akto defensivo de Israel esta presentado komo krueldad, komo injustisia, komo barbarismo. Para munchos Turkos los Judios están vistos komo responsables de la politika de Israel. Ay ke admitir ke eyos traversan tiempos diffisiles. Ekzisten Judios ke kritikan las actividades de Israel, pretendiendo ke no esta pensando a los Judios de Turkiya.

Kuando Israel y la Turkiya tenían sus relasyones mas buenas, bazadas sovre interesos mutuales, la Itahdut sigyo la linya de no kritikar a la Turkiya en ningún kavzo. Siempre se tuvo ke mantener buenas relasyones kon los diplomatos Turkos, siempre resivimos y ayudimos a los doktorantes, investigadores y akademikos Turkos. Pensamos ke esta forma de hospitalidad es en el intereso de Israel komo los interesos del Judio de Turkiya.

Esto deve kontinuar, todavía ke Israel y los Judios de Turkiya profitan de la hospitalidad de nuestra parte La grande limite deven de ser las mentiras ke intosigan la opinión publika Turka y indirektamente a los Judios de ayi : nunka tenemos ke estar kayados kuando Israel es insultado, presentado komo Nazista, komo barbaro sin piadad, y a los Judios komo puevlo ke vino y se arrovo la tierra de los Arabos Palestinos, Islamofobo, keaze ekskavasyones en el Kotel Hamaaravi para destruir los fundamientos del Mescidi Aksa para formar el 3 er Beit Hamikdash. Kere dizir, ke la Itahdut deve de ayudar a la “hasbara” de Israel en lo ke konserna la Turkiya.

Otra tarea importante devria ser de topar la formula onde todos los grupos diferentes ke formaron los Judios de Turkiya en Israel serán basho el techo de la Itahdut. Aliya de los anyos 48-50 y Aliya de los anyos 2000 no deven de sentirsen diferentes, malgrado ke los nuevos vinieron kon una pozisyon sosyo-kulturala son distinktas.

El Ladino : somos los kavos ke konservan esta lingua y kultura. Los pionieros de la tradisyon, folklor y muxiks del Judio Sefaradi de Turkiya son los Turkanos de Israel. Ay ke kollaborar kon la Autoridad Nasyonala del Ladino, el Sentro fundado por el Sr. Salti, y enkorajar el estudio de nuestro pasado linguistiko, musikal y historiko.

Esperaremos ke el nuevo presidente y su ekipa tengan “Reushitad Buena”.

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon