LA ALIYA DE TURKIYA y MOSHE HESS

January 20, 2018

 

Esta semana vimos en la televizyon el reportaje echo kon los Judios de Turkiya ke izyeron sus aliya enlos anyos dalkavo  Kreo es por la primera ves ke la opinión publika en Israel se interesa kon la aliya de Turkiya.

Mas y mas en estos kavos tiempos, mezmo los ke se sintiyan ke en primero son Turkos y después son Judios (resultado de la indokrinasyon ,del sistema de edukasyon, y sovretodo del manko de edukasyon Judia o sionista), arivaron a la konkluzion ke la tolerensia y la fidelidad a la Turkiya no abastaron a ser sivdadinos iguales kon la majoridad musulmana.

Los ke aparesen en este reportaje, todos izyeron remarkar la difikulta de ser Judio en la Turkiya de Erdogan oy. La augmentasyon de 100 olim al anyo a 400 en 2017 es una prova de los trokamientos y las akuzasyones falsas del presidente Turko. Sus deklarasyones enflamadas contra Israel no azen mas ke fabrikar antisemitas perikolozos kontra los pokos Judios de Turkiya.

Alp Penso y su esposa son el model tipiko del jóvenes edukados de Turkiya ke tomaron la buena desizyon. Vinyeron a formar sus futuro y el futuro de sus kriaturas en Israel. La famiya Kohen Yanarocak representa, esto seguro, al Judio de Turkiya:  Bien adaptados a la vida en Turkiya ma siempre en eyos akel sentimiento de ser parte de la nasyon Judia, de perkurar a konservar su patrimonio nasyonal y kultural.  Vimos tanbien komo los olim de Turkiya se están adaptando a la vida en Israel, malgrado todas las difikultades.

Sara y David Kohen Yanarocak enbiaron a sus dos ijos a estudiar y bivir en Israel (todos los dos reusheron muy bien en el pays), y después vinieron eyos mezmos, serka de la famiya y inyetos.   Los Yanarocak tienen otra partikularidad : Desde el anyo 1993 ke eyos formaron un grupo muzikal en Istanbul, yamado “Erensya Sefaradi”, unikamente para azer sobrevivir y transferar a la jenerasyon nueva la tradisyon muzikala de los Judios de Turkiya,ke son  inyetos de los ekspulsados de Espania en 1492. Ademas, La Sra. Sara Yanarocak eskrivyo regularmente al jurnal Shalom,  mezmo publiko un livro sovre la mujer Judia de Turkia, ke es una investigasyon echa kon 99 mujeres diferentes.

Y agora eya eskrive en el sitio internet y el Bulten de la Itahdut Yotsei Turkiya en Israel.(www.turkisrael.org.il)

Esta aliya me aze pensar a un personaje muy importante en la historia moderna de los Judios: a  Moshe Hess  (1812-1875)

Si el fundador del Sionizmo es Dr. Theodor Herzl, ke era bastante assimilado a la kutura Evropea, después de aver visto komo el antisemitismo era tan enrasinado en Fransia en particular kuando fue a Paris komo jurnalisto Austriako en el anyo 1894, el ideólogo importante del nasyonalizmo Judio se yama Moshe Hess, ke diziya, en su livro (Roma y Yerushalayim), publikado en el anyo 1862:

1-Los Judios siempre kedaran estranjeros entre los puevlos de Europa, ke pueden emansiparlos, rekonoser sus derechos por razones de humanidad y justisya (lo ke esperavan los Judios de Turkiya kuando refuzaron el status de minoridad en el tratado de Lausanne en 1923), ma esto nunka kavzo a ke seygan rekonosidos y  respektados,  mezmo kuando eyos diziyan “ande estamos bendigamos”  o en Latin : “donde estas bien ayi es la patria – Bene Ubi Ibi Patria”.

2-La historia mostra ke el tipo de Judio es indestruktible, y el sentimento nasyonal Judio no puede ser extirpado(arankado) de eyos. Esto malgrado ke , sovretodo en la Alemania, por el bien de una liberasyon mas amplia y mas general, munchos se konvensieren y miraron de asimilarsen. Los non-judios nunca tadraron de azermos akodrar ke somos Judios y diferentes.

3- Si la emansipasyon de los Judios no es posible (kuando se deklaran de  nasyonalidad Judia), no tienen otro remedio : eyos deven de sakrifikar la emansipasyon y kedar Judios kon sus nasyonalidad. Hess considera, en 1862, ke la unika solusyon de la kestion Judia es de boltar y bivir en la Palestina. 35 anyos antes de Herzl.

4- El Judaismo tiene sus rayizes en la amor por la famiya; patriotismo y nasyonalismo son las flores de su espirito, y la kreasyon de una mijor sosiedad humana será el fruto del Judaismo.

Israel es el avenir del puevlo Judio, ke desde el siglo 20 no es mas un puevlo ke su ekzistensia depende de la tolerensia de los otros. Somos una nasyon, kon una lingua, patria, bandiera, independientes, orgolizos, y kontinuamos a lavorar por el bien de la humanidad entera.

El Judio ke emigra a otro pays bazandose sovre la konosensia de la lingua solo, komo el Inglez, Fransez o Espaniol aze una sola koza: troka una gola por la otra. Esto no es la yave para kontinuar la ekzistensia Judia.

 

 

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon