ADIO A LA PREZIDENSIA.

January 17, 2018

Mueve anios enkavesi la Moatsa de la Itahadut Yotsei Turkia ( La Union de los djudios turkanos en Israel)” IYT”.   Oy vino el tiempo de saludar, de azer mi reverans i de  dizir ‘adio’ i retirarme de este posto.  No sere mas kandidado a la prezidensia en las muevas eleksiones  porke penso ke el tiempo vino de transferar este posto importante  a un muevo miembro  muncho mas joven de mi.   La IYT es la sola institusion ofisiala ke los djudios de orijin turkana tienen en Israel.  Eya fue fondada atras munchos anios i  fue i será el sentro  de la vida djudia sefaradí turkana.  Durante 60 anios eya  ayudo prensipalmente   a los ‘olim’ , imigrantes de Turkia a establesersen en Israel.   Ayudo, además, kon lo poko de medios ke tuvo a nesesitozos, a bivdas kon famia, a dar bekas a estudiantes de universita viniendo de famias ladino avlantes , organizo konferensias i estudios sovre la vida sosyala, korsos de ebreo i  de turko.  Ademas los dirijentes se okuparon a krear buenas relasiones entre Israel i la Turkia.  Siempre ovraron para ke se kreyga amistad entre los pueblos i ke se dezvelope  el komersio, el turizmo i mas.

  Durante el periodo miyo tuvimos altas i bashas entre las relasiones diplomatikas de los dos paises i lo mas difisil fue la manera de administrar esta situasion.  Espesialmente  la perioda dospues del insidente grave de la nave Marmara.   Durante 4 anios el governo turko  formado por el partido politiko de Justisia no se dentuvo de azer deklarasiones  de inimista enverso muestro país.  Situasion ke malgrado ke las relasiones diplomatikas fueron establizadas de muevo al nivel de ambasadores,  poko tiempo antes,kontinuo i pensó ke va kontinuar kon la kriza aktual de Yerushalayim.  La Turkia no solo siege una politika pro araba i  uza esta taktika para dezvelopar su politika enterna basada sovre el Islam relijiozo,mira de otra parte de aserkarse  i de alinyarse sovre la  politika del Iran muestro  mas grande inimigo.   Bien entendido malgrado todo mirimos siempre de estar en buenas relasiones kon los representantes diplomatikos turkos. 

Los 3 anios dalkavos de mi kadensia se vido una imigrasion importante de la djente djudia turkana, koza ke mos forso a organizarmos diferamente.  En jeneral en los anios 2000 fin a 2014  el nombre de los olim no depasava las 60/70 almas por anio. Desde 2015 este numero ampeso a dublarse i mismo el anio pasado de kuadruplarse.  Bien entendido esta vinida no se puede komparar kon la vinida de los anios de la kreasyon del estado. Fin 1950 mas de sesenta mil djudios avian vinido de Turkia. Oy en dia malgrado ke no se konose djustamente el montante de djudios ke kedaron a bivir en Turkia,  pensó ke mozotros devemos  de egzistir komo enstitusion i lavorar para ayudar a muestros ermanos a vinir a estableserse en Israel.  La Medina es el solo país onde el djudio se puede konsintir en liberta i resivir todo modo de ayuda para estableserse.  Ke país en el mundo da ayuda material al imigrante apenas ke entra en sus frontieras?  Solo Israel, basta ke el ke viene sea djudio.  Entiendo bien el motivo aktual del ke viene a estableserse en Israel, ke es ekonomiko i por esto el aze lo ke le konviene lo mas. El idealizmo sionisto  se transformo en idealizmo de buen bivir.  A mi no me importa  la motivasion del ole basta ke  su akomondamieto en el país seya no muy komplikado. Por egzemplo la lingua es un endikap durante  los primeros tiempos de vida en el país, ma este endikap se regla kon el tiempo, i no importa si el ebreo ke avla no es de alta kualitad literaria. 

La mueva moatsa i la direksion de la Union  ke se eskojeran al 21 de Enero  kompozadas de jovenes de edukasion alta, espero  se dezveloparan kon modos modernos de teknolojia.  Espero kon konviksyon ke el muevo prezidente de la moatsa  no será deshado komo mi solo en el lavoro el mas engrato de arokejer fondos para la institusion.   Durante 9 anios fui el solo a bater puertas para ke ayuden i  agan donasiones a esta kaza djudia.   Dingunos en el IYT no vino de si para si a ayudarme, sino ke yo forsi a los prezidentes de la IYT a darme una mano.  Los presidentes viejos komo Momo Uzsinay i Zali De Toledo fueron mas kooperativos i ansi los rengrasio.  Si me demandash si solo esto es  la sola kritika ke azere, no lo pensó.   Sea los presidentes kon los kualos kolabori sea personalmente no fuimos kapaches de krear la atmosfera de amista kon las otoridades de Yerushalayim en el kampo de la alia.   Espero ke los ke  okuparan muestros lugares van a reushir  mijor.

Keridos lektores ansina  komo vos ago saver yo me vo , ma no  mankare de eskrivirvos  en esta platforma  en Ladino para  estar en kontakto kon vozotros ke sosh  amorosos de muestra lingua de kaza tanto amada.

 

Al vermos

 

POEMA DEDICADO  A SELIM SALTI

Margalit Matitiahu

 

Querido Selim Salti

Te escribo unas cuantas palabras de admiracion

Por lo que haces para la lingua de muestra nación.

 

Continuas realizar tu esfuenio sin quedar.

Con todo corazón siempre el tiempo dedicar

A la obra importante que en camino la metites

Para las muevas generaciones lo izites.

 

Como un profeta te vino la idea,

Sin saber que va salir de ella,

Con la fe profunda djunto el esfuenio de tu corasón,

Reushites llevar todo al camino de la realización.

 

Por esta ardor y el fuego especial en tu persona,

Agora tenemos mozotros alegría con corona.

Del Instituto Ladino Naime y Yehoshua Salti,

El agradecimiento con toda alma es para ti.

 

Tu conferencia en Bar Ilan en el dia del 18 Maraton,

Llegaron tus palabras de corazón a corazón,

Cuando me emociono la historia de tu chiques

Como fueron en Estambol padre i hijo una vez.

Esto fue en los tiempos que no se sabia

Que sorte de vida para los djudios ser podía.

 

En mi imaginación te via mirando a la cara de tu padre,

Con demandas mudas sin preguntar como y ande.

Solo con los sentimientos que se tienen que guadrar,

El ser Judio con orguilo y mantenerlo sin parar.

 

Tradicion, lingua, romansas y literatura

Y mas costumbres que concerna la cultura,

Muestros padres mos desharon una buena erencia

Que tu la continuas con muncha querencia.

 

En todo lo quehaces sos modesto,

Con sonrisa y humor y con mucho respecto,

En muestra boca tenemos palabras de bendición

Que continues muchos anios actividad con pacion.

 

Por fin querido y admirado Selim Salti,

Te digo del fondo de mi corazón dos palabras

Que contienen todo :munchas gracias.

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM

Tel: +972 36582936
Fax: +972 36573894

turkisrael@gmail.com

ADRES

Mohrey Sigariyot 7 Bat Yam - Israel

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon
İletişim ve faaliyetler hakkında bilgi almak için