El umor de los judios del imperio otomano


Aze unos kuantos anyos ize una investigasion sovre el umor tipiko de los judyos del imperio otomano.

Ma no kuidesh tanto. Oy, no vos vo dar ningun pilpul akademiko. Vamos avlar endriva endriva, de este karakter de umor, i vos vo kontar una shakayika i un kuenteziko, para ver de kualo se trata.

Es ke ay diferensia entre el umor de los Jidios Sefaradim al umor de los lehlis o de otros puevlos?

Solo por darvos un chiko enshemplo por ver la diferensia, vos kontare una shaka ingleza, bien yelada:

En un kazal biviyan kon paz i amistad, kuatro ermanos.

El uno era bikyar (soltero)

Dos de eyos eran kazados.

I el otro TAMBIEN nunka no komyo kezo blanko.

Me parese ke el umor muestro es mucho mas lojiko.

Ma antes de todo kiero apuntar ke no toda la djente tiene un senso de umor. El muy simple egzamen si tienes o no tienes este senso, es, si areevas shakas a tu kuento tambien.

Una vez mas vos do un egzempio:

Ya savesh ke los sefaradim de la jenerasion pasada avlavan en una manera de travar la palavra, komo kantarla:

"keee? Estas bueeeeno?"

Ma kuando alguno keriya dizir a su amigo ke le avle klaramanete, sinsero, i sin hadras fransezas, le dizia:

"E bueno, avla kantando".

Una koza muy tipika al umor sefaradi es ke no tenemos deltodo shakas de karakter makabre o espantozo.

Entre sienes de shakayikas i kuentos, fue una sola ke topi en el janer makabre. Aun kon todo, meted tino a tanta naivo i inosente es el kuento ke vos kontare.

Ansi son lo mas de las shakas sefaradis:

Naivos, simples, i inosentes:

Un Jidio simple, me parese ke era hammal en la kyoshe de la kaye, estava echado en la kama, muy hazino, perso para murir. Aun ke no era deltodo relijiozo, no saviya ni Tora ni nada, demando a yamar al haham.

Ya era media noche, ma el rabino -azer mitsva- vino korriendo.

Le disho el hazino: "Senyor haham, kiero dizir la beraha de "Sheeheyanu".

- "Ke manera?" le disho el haham. "El doktor no te disho en ke hal estas agora?

El Sheeheyanu se dize kuando por la primera vez estrenas koza mueva, o…

- "Djustamente" le repondio el hazino "Siendo ke es la primera vez ke yo me vo murir, tengo de dizir Sheeheyanu. No?"

No siempre ay en el umor sefaradi lo ke konosemos komo "puenta", "puenta" es el punto ultimo ande esperamos ke todos echen la taraka de riza.

Las shakas de los djidios sefaradim, jeneralmente, no son kurtas. Paresen mas a una konsejika, i la savor de la shaka no esta konsentrada a la fin, sino en komo la savoreamos, avagar avagar, entre un sorvo de kave turko al otro.

Kuando muestros padres biviyan en Espania, konosian muchas konsejas sovre los "bovos de Makeda".

Ma en el imperio otomano ya toparon muestros padres las konsejikas de Nasser a-din Hodja, i ansina, kon el tiempo, se olvidaron las konsejas de Makeda, o se mesklaron en estos de Nasser a-din hodja i Hershele de muestros ermanos Askenazim.

Buenas echas de Djoha, ma no mos olvidemos ke Djoha no es solo muestro. Es de todo el oriente, desde Uzbekistan asta Irak, Siria i Turkiya.

En dos tres biervos kiero notar, ke el umor en jeneral,

no es solamente shakas o konsejikas ke te azen riyir, o sonriyir. Muchas vezes el umor es un alat, un instrumento, un medio muy importante para transmeter ideas, o por pasar keshas kontra tal persona.

Ay una dicha sefaradi ke dize:

"Te kieres vengar, es en la ora de la shaka".

Muestras nonas/avuelas uzavan muchas endevinansas kon kara de riza.

Vos do aki un solo enshemplo, avlando por la sensia de GENETIKA.

Mujer ke no pare, la ija pare?

El umor sefaradi se nota tambien en las dichas i en los refranes, i muchas de las dichas teniyan algun atadijo a kozas de la Ley judiya.

Por egzempio. Se deziya por alguno ke kiere avrir

un negosyo, un echo muevo, ma no tiene en mano ni el talento, ni la moneda para alkilar butika.

Por tal ombre diziyan:

Ayinda le mankan MUEVE para el minyan.

I tambien konosesh por seguro por akel ke

de tanto de dizir amen, se le kaye el talet.

En kurto, las shakas i las konsejas entre los Judyos sefaradim no eran solamente por pasatiempo, sino por dar dotrino.

Kaje kada shaka teniya su moral.

Muchas vezes, el titolo de la shaka o de la konsejika ya se azia komo una dicha o un refran.

Bueno, el tiempo apenas me desha kontarvos una kensejika bazada sovre una dicha.

Tenemos la dicha

"Al rey le plaze figos" o al rey le plaze igos".

Lo dizen kuando alguno no te entiende la verdadera realidad o la sinyifikasion de alguna koza.

I nalda la konseja:

Mos kontan, ke un dia salio el rey kon su armada a la gerra kontra su enemigo de otro pais.

Antes ke pase la frontiera, en un kazal, vido el rey a un ombre viejo plantando plantasiones de igos.

Se aserko el rey i le demando:

- "Bre ombre, ya sos bien aedado. Es ke vas alkansar komer de estos arvoles de igos?"

- "No se" disho el kazalino "si tendre Zehut - komere.

i si no, ke koman mis ijos detras de mi".

Pasaron anyos. La gerra ya termino de kuando, i el pais

- inshalla ande mozotros tambien- estava en paz i en repozo. Los arvoles de igo dieron unas frutas maraviozas. Unos figos dulses mas ke la miel!

Akel ombre viejo, tan alegre de las frutas, se akodro del rey, i desidyo de yevarle un regaliko para rekordarle de akea konversasion ke tuvieron anyos i panyos atras.

Tomo el ombre un sestiko chiko, lo incho de igos ermozos, i se lo yevo al palasio del rey.

Seguro ke al empesijo no lo desharon entrar.

?Ke kada uno puede entrar al palasio del rey?

Ma, kuando lo avizaron al rey kien lo vino a vijitar, lo desharon entrar.

El rey se emosiono mucho de ver al viejo kazalino, i la esperansa ke tuvo de gozar del fruto de su lavoro.

Entonses, el rey ordeno de inchir el sestiko del kazalino kon liras de oro.

La boz salio en akel kazal :

- "Mirando aki! Al rey le plaze figos. Al rey le plaze igos.

Korrieron todos al palasio kon sestos de igos…

Al rey le plaze igos.

***

Karos oyentes, vos bendigo:

Salud buena i alegria en el korason!

Etiketler:

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon