UNAS KUANTAS ANEKDOTES

October 25, 2017

 

--Sinyor Kohen se merko un Lambordjini, i se fue al Haham Ortodokso para ke le meta una mezuza al otomobil muevo.

     --Kualo es Lambordjini? Le demanda el haham.

     --Lambordjini es un otomobil italiano muy luksozo.

     --Yo no te puedo dar mezuza para un otomobil italiano, vate ande los konservativos.

El haham konservativo le demanda la mezma kestion, i tomando la repuesta, se inyerva.

     --No pasha, yo no te do mezuza para un otomobil de goyes. Vate ande los reformistos.

Vinyendo ande los reformistos, el haham reformisto le dize:

     --Siguro ke te puedo azer el dezeyo.

El ombre se enkanta:

     --Bueno, ya saves lo ke es Lambordjini?

     --Komo no va saver. Lambordjini es un otomobil italiano muy luksozo. Bueno, kualo es mezuza?

 

 

-- Sinyor Kohen esta para murir. Los kuatro ijos estan alrededor de la kama.

      --Ay borekas de berendjena en el orno parese. Ke savrozas ke las aze vuestra madre. Me dezeyo una boreka.

Presto, el ijo chiko se va a la kuzina, ma torna atras las manos vaziyas.

     --Mi madre disho ke son para duspues los funerayes.

 

--Sinyora Kohen lo embiya al ijo a la Amerika, para ke estudie en la universidad. Pasa un tiempo, un diya el ijo le telefona:

      --Mama, yo deshi la eskola

      --Bueno pahsa.

      --Me kazi.

      --Bueno pahsa

      --Tomi una mujer kristiana

      --Bueno pahsa

      --Me nasyo una ija

      --Muy ermozo pahsa

      --Estomos vinyendo a verte

      --Muy bueno pahsa

      --La estomos trayendo i a mi esuegra

      --Si pahsa

      -- Mama, mos vaza apartar una kamareta para kada uno

      --Si pahsa

      --Bueno, i tu, ande te vaza echar?

      --İ yo me va echar de la ventana abasho.

 

El shastre Avram eskapo de kuzir el kostum de su kliyente. El kliente se lo esta aprovando una vez dalkavo, antes de tomarlo.

     --Avram, me esta paresyendo ke el ombro derecho esta un poko por abasho.

     --Alevanta un poko el otro ombro. Vites komo se enderecho agora.

     --La yaka no esta un poko tuverta?

     --Yeva la kavesa un poko par atras. Ah, agora esta bueno.

     --Ke dizes? La jaket no esta un poko larga por detras?

     --Abokate un poko para delantre. Hah, agora se enderecho.

El kliente toma la jaket, i se va. Dos amigos de Avram lo ven salir del apartamento.

     --Ke buen shastre este Avram’, le dize el uno al otro. ‘Mira ke ermozo  kotsum ke le kuzyo a este charpeyado.

 

 

El viejo Prezidente Bush se va a la CIA, para demandar ‘komo puede ser ke, los judios, antes de todos, estan al koriente de todo lo  ke se pasa en el mundo.

   --Ah, le dize el shef de la CIA, muy fasil,  los judios todo se demandan de uno al otro ‘ke ay, ke no ay?

Bush se desida de vistirse komo un judio relijozo, i sin dizir nada a dingunos, se va a Brooklyn. Esta siguro ke kon esta vistimienta, dingunos no lo pueden konoser.

En kaminando en las kayes de Brooklyn, rankontra un viejiziko, i komo el shef de la CIA le aviya dicho, le demanda ‘Ke ay, ke no ay?’

El viejiziko se aserka deBush, i para ke dingunos no puedan oyer, a boz basha, le dize: ‘Bush esta en Brooklyn’.

 

 

En la primera gerra del golfo, kuando se dava el alarm, todos los israelianos presto abashavan al refudjyo, para pueder protejarsen de los skutes.

Ya se dyo el alarm. Ma Sinyor Kohen esta dainda una por aki, una por aya.

   --Deke no vienes? Ke estas bushkando? le dize la mujer.

   --No esto topando los dientes. Ande los meti?

   --Presto kamina. No tienes menester de dientes. Te esta parisyendo ke te vana echar sandviches.

 

La ija de Sinyor Kohen se desido de kazarse kon un buen judio. Sinyor Kohen le esta demando al mansevo, ke son sus planes para el futuro.

- Ke echo azes? Komo la vaza mantener a mi ija?

- Dainda esto estudiando, ma ke no se mirikeye el, kon el nombre del Dio, ya va topar un buen echo.

-  Bueno, ya vos desidatesh ande vaja bivir?

- Dainda no savemos, ma kon el nombre del Dio,  ya vamos a merkar una kaza ermoza.

-  Ande se va ezer la boda? Los gastes de boda? Komo se va reglar esto todo?

- El ke no se mirikeye, kon el nombre del Dio, ya vamos a reglar esto todo.

Mas duspues, Sinyora Kohen le demanda al marido, komo lo topo al mansevo.

- Muy buen mansevo, le dize Mosyo Kohen, solo ke le esta paresyendo ke yo so Dio.

 

– Anyos antes, en un kazal leshos de la sivilizasion, aviya una komunidad judia. Akel anyo, munchos mansevos, i munchas kreaturas empesaron a murirsen de una epidemia, ke no se estava topando remedio.

A la fin, el prezidente de la komunidad se desido de azer vinir un profesor de medisina de Brooklyn. El prezidente estava asperando un profesor judio ma el profesor ke vino salyo kristiano.

El profesor estuvo una semana kon eyos, los izo bueno a los hazinos, les ambezo los semptomes de esta hazinura, i les ekspliko komo se vana protejar para no azersen hazinos.

El diya ke el profesor estava partiendo, los judios se desidaron de darle un regalo. Kaliya darle una koza ke lo veyga kada diya, i kuando lo va ver ke se akodre de eyos.

Pensaron, i pensaron, no estavan topando kualo darle.

Enduna uno dentre enyos se alevanto: ‘Ya topi’ disho, ‘Lo azeremos berit’.

 

7-Una noche de Noel, el sielo se aklaro komo si ke fuera de diya. Enduna, Jezu salyo dentre las luzes, i abasho a la tierra. Las personas enkantados, lo estuvieron mirando sin entender nada. De punta, Jezu empeso a entrar a los supermarketes.

 

-Tanto bien ke ay en estos supermarketes, i las personas proves se estan muryendo de la ambre. Ermanos, vini todos aki, toma lo ke keresh, mas dingunos no va kedar ambierto.

 

Repetando estos biervos, Jezu kontinuo a entrar de magazen en magazen. Todos estavan kontentes komo ke si fuera una fiesta.

 

Enduna, Jezu avriyo la puerta de un magazen, repetando los mezmos biervos, komo siempre. El patron del magazen Sinyor Kohen, lo miro en la kara kon inyervo, i echo un grito a su mujer: ‘Rashel, presto tray el martiyo i unos kuantos klavos, este ombre de muevo salyo en medio’.

 

 

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon