POZİTIVO Y NEGATİVO EN İSRAEL

October 11, 2017

 

Todos somos orgoliozos de ser Djudios, mezmo si no bivimos en Israel. Komo savemos, el Judaismo de la diáspora siempre viene al ayudo del Estado Judio en sus oras diffisiles y se identifia kon el ,enfrente de los suksesos grandes en la sensia, teknolojia, industria, agrikultura, de la  armada y servicios de intelijensia.  Un pays tan chiko kon un nivel tan alto de instruksion ke sierve de garansiya a toda persona Judia y mezmo non Judia en sus oras de persekusion o katastrofas naturales, no importa en ke kanton del mundo.

Mezmo kon diferensias entre la konsepsion (ken es el Judio?), de ver ke en sus 70 anyos de ekzistensia no desapareyeron las diferensias entre Judios de diversos payses, mentalidades, uzos y kostumbres,  y malgrado la grande proporsion de non-Judios ke forman la populasyon, existe un sistema de justisya, de salud, de edukasyon ke son egalitarios. Ninguno puede kesharse de no obtener su derecho, de no tener tratamiento medikal o de no poder estudiar porke no gana bastante.

El arte tiene un lugar muy importante en Israel. Se publikan libros y se eskriven en grande proporsion komparando a otros payizes. El meldar, pintar, ir al teatro, a los filmos, a los konsertos de todo modo de muzika, las ekskursiones a todas las partes del pays  son muy populares.Y  la verdad es ke en kada paso ay un sitio de importansa arkeolojika o una maravia de la natura.

 Para ser un pays tan chiko, Israel tiene resultados importantes en el Sport. Maccabi Tel Aviv es una autoridad en el Basketball mundial. Munchos atletas y otros sportivos obtuvieron medalias olimpikas

Ma no todo es perfekto. En vezes se demanda la persona komo puede ser ke en un payis komo Israel, kon su produksion y revenidos tan altos per-capita,  agora kon sus propios manaderos de enerjiya (el gaz natural),  sus deskuviertas teknolojikas ke se venden por milyones de dólares,, aygan tantas inekualidades, tantas kriaturas ke biven debasho del nivel de provedad, tantos krimes, tantos aksidentes,  ke los  vıejos y sakates ( kon disabilidades diversas) salgan a las kayes para gritar ke no están podyendo mantenersen y están en miseria por ke las alokusyones de disabilidad no fueron adjustadas al koste de la vida.

Todo esto es kuaje independiente de la situasyon politika, vizinos ke no mos keren ver ekzistir komo Estado Judio en el mediano-oriente, una populasyon non-Judia de 20 %, kere dizir kuaje 1,7 milyones de personas.

Si las mezadas son mas altas en komparando a otros payises, la vida en Israel esta muy kara. Un apartamento en las grandes sivdades tiene presio de una villa grande en otro pays. Ma no uvo ole ke no pudo tener su apartamento y echo y eskola para los ijos y doktor en kavzo de hazinura.

Si los fundadores del Estado de Israel  eran por lo mas miembros de Kibutz, mezmo sus revenidos komo ministros entravan a la kasha del kibutz y eyos bivian modestamente, en los 70 anios  los  dirijentes del pays se izyeron mas materialistas, bushkaron mas sus intereso y plazer.  Ken diziya ke en el Estado Judio, al kual arivimos después de dos mil anyos de separasyon y de sufriensa, ivamos ver en prezyon presidente de la republika, primer ministro, ministros y deputados ¿

No me plaze ke las relasyones entre personas en Israel no son ideales: ekziste un manko de konfiensa, un manko de aserkamiento y de saludo mezmo entre los habitantes de un apartamento. No ay el “ bonjour madame, bonsoir Monsieur” de los Fransezes, no ay el “misafirperverlik –hospitalidad” ke vimos en Turkiya, no ay akeya relasyon de veneridad a la persona aedada.  Las relasyones humanas se limitan en sirkolos de amigos de eskola o de la armada, y de famiya solo en okazyones de fiesta o tristeza familiales.

No arivo a entender por ke, kuando en el mundo Judio el movimiento reformista attira mas y mas a la jenerasyon moderna.  Komo el mundo entero tanbien el Judaismo es parte de los trokamientos, de la manera de pratikar la relijyon Judia, ma el Estado de Israel no rekonose mas ke el Ortodoksizmo ¿ La manera de bivir, de vistir, de pensar y de komportarse enverso del Estado de los Ultra Ortodokses (Haredim) es en kontradiksyon kon lo ke representa Israel, ma el sistema demokratiko aze ke los Haredim Eskenazim y Sefaradim kontinuen a chuparsen los dedos “ del budgeto del Estado, kon preteksto ke solo el estudio de la Tora es ke defenderá a Israel de sus enemigos.  Muy diffisil esta de azerlos salvar de la provedad y inyorensia para ke puedan ser produktores de parnasa (moyenes para bivir) para ellos y sus famiyas,  kuando eyos insisten ke embezar la Tora es mas importante de saver Matematika y Inglez y historia del mundo.  Difisil, ma parese ke ya empezaron a entender ke ay ke trokar kavesa: la armada aze muncho para konvenserlos ke el servisyo en la  armada, el pratikar una profession no kontradizen la alaha.

“Ken es el riko? El ke se kontenta de lo ke tiene” dize el proverbo. Israel tiene muncho de lo bueno y kozas ke ay ke atakanar.  Lo mas importante es ke es muestro. Siempre progresar, siempre ser útiles a la humanidad, siempre amejorar las kondisyones de la vida en el payis, mas muncha igualdad, menos konfliktos entre Judios, paz kon los Palestinianos –kon los kualos tenemos ke bivir siempre- , ser modelo y atraktivo al mundo Judio, estas son las tareas del Estado de Israel.

Rosh Haayin, Octobre 2017

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon