KUENTOS MIOS SOVRE DJOHA

KUENTOS MIOS SOVRE DJOHA

Keridos lektores,

Esta ves desidi de kontarvos unos kuantos de los kuentos ke eskrivi sovre djoha en mi manseves, una vieja uzansa en mi famia, sovre todo de mi padre de bindicha memoria, ke me los kontava entre otro sujetos, siempre kuando eramos solos los dos, kaminando en enverano oras de tadre en las pasanjatas doreadas de flores del foburgo Termal de la sivdad de Yalova, lugar amado de la alta sosieta de Estambol en los anios trenta,kuarenta i sinkuenta del sieglo pasado. Kontavan ke Ataturk vinia a azer banyos kayentes siempre ke la okazion sele prezentava.

I agora mos meteremos a riyir grasias a Djoha.

El rey kruel

Djoha un dia estava asentado a dos pasos del rey el mas kruel de su epoka, ke lo avia yamado para avlar kon el.

El rey le dize:”Dime, Djoha, ke diferensia ay entre ti i un azno?”

Djoha se pensa i le responde :”No mas ke de dos pasos”

En punto de muerte

Djoha estava para murir, echado en la kama.

La yama a su mujer i le dize:”Presiada te va rogar vístete el mijor fostan ke tienes, penyate, enjoyate, metete el parfum ke me gusta, i ven asentate al lado de mi.”

La mujer, enkantada ,le pregunta “Djoha, komo de demandas tienes! En el estado onde estas yo me va ermozear , para ken?”

“Djustamente” le respondio Djoha,” Kuando el guerko va vinir , puede ser ke se namora de ti i al lugar de tomarme a mi te toma ati.”

Perro o azno

Djoha en kaminando por la kaleja renkontro a una de sus viejas konosiensas, ke kaminava kon su perro. Djoha no tenia por el dinguna sempatia

Le dize Djoha:”Ande te estas yevando a este azno?”

Su konosido le responde:”Komo puede ser, Djoha? Este es mi perro, no es azno. De ande estas kitando ke es azno?”

Djoha le responde:”Siente, no es a ti ke esto avlando, si no ke a tu perro!”

Buen konsejero

Una demanyana Avramiko se hue ande Djoha para demandarle konsejo.

“Mira” le dize,”tengo dos namoradas. La una es ermoza, entelijente, ma prove, todo en siendo muy manseva. La otra es feya, torpe ma muy rika i un poko aedada. Kon la kuala ke me espoze, ke me konsejas?”

Le responde Djoha:” Tu va tomala a la manseva i te va rogar : no t’alvides de darme el numero de telefon de la vieja.”

Dos e.shuegras

Rachel i Djoha eran kazados desde munchos anios. Una demanyanada komo las otras, Rachel kon su demandadero ke no eskapa, le pregunta a su kerido marido i dize:” Dime porke tu no keres bien a mi madre?”

Djoha kualo ke le responda? Una vez ke le paso el enkanto , le dize :” Kerida yo kero bien a mi e.shuegra muncho mas de lo ke keres bien tu a tu e.eshuegra.

Ansi termino de kontarvos kuentos por esta ves. Si veygo ke el Djoha miyo vos enteresa no mankare de kontarvos a su sujeto a las proksimas eskritas.

Etiketler:

Bizi Takip Edin
  • Facebook Basic Square
  • Twitter Basic Square
  • Google+ Basic Square