Refleksiones sovre la letra sinsera de un joven judyo de Turkiya (*)

September 26, 2017

 

En el sitio AVLAREMOS aparesyo el 23 de Septiembre la letra esmoviente de un joven judyo  de Istanbul, Nesi Altaras, kon el titolo “ Taşınmayı konuşmak’’, kere dizir ‘’avlar de transferirse a otro lugar’’. Este sitio es remarkable por el koraje ke muestran sıertos Judıos  en Turkıya y en lingua Turka,  ‘’Avlaremos’’ es justamente la oppozisyon a la ‘’kayades’’ tradisyonala  De esta letra embezamos ke el pensar y avlar sovre la posıbilidad de deshar la Turkıya  se izo el sujeto de kada dıa entre los Judios de este pays.

Eya save muy bien ke la majoria grande de los Judıos se fueron de la Turkıya por razones de los trokamientos ke akontesen, prinsipalmente la atmosfera antisemita, las difikultades ekonomikas y la dıffikultad de dar una buena edukasyon a las kriaturas. La destinasyon es Israel y los Estados Unıdos y Kanada en jeneral. En su letra, esta mansevika ekspoza sus hesıtasyones frente de la atmosfera ke ınfluensa oy al Judıo de Turkıya. No ay mes ke no ve ke uno de sus amıgos se aparta y lo augurıen en dıversas formas,  y esto mas y mas los kavos 5 anyos.

Desde 2003 la kollektividad Judia traverso una trauma kon las attakes a las sinagogas, kontinuando kon los eskandalos de (Mavi Marmara y One minute) ke kavzaron no solo la ruptura de las relasyones Turkıya Israel, ma ınfluensaron de manera muy negativa elkomporto Turko enverso los Judıos kalmos del pays, 10000 difisilmente entre 80 milyones de popülasyon.

Desde 2010 la ekenomia del pays se seta relentyendo y sovretodo la manseves esta entendıendo ke se trata de situasyon irreversible ke no les permetera de bivir konfortablemente y sovredodo de edukar a las kriaturas. Y kuando falta la motivasyon Judia,  se desida de ir a bivir a New York, a Miami, a Toronto y  no a İsrael.

Nesi Altaras dizeke la emigrasyon se esta viendo mas el ultımo anyo. Es verdad, porke si solo a İsrael imigraron kuaje 500 personas de Turkiya, en ajustando los ke se estabılısyeron en las Amerikas, y la proporsıon negatıva entre nasımıentos- muertes- kazmayentos mikstos, se konstata una diminusyon importante de la demografia Judia en Turkıya. Esto tiene dos influensas, la primera es de ver ke no ay muncho tiempo para ke el Judaısmo de Turkıya  veyga sus kavos dias,  despues de 6 siglos de prezensia y de integrasyon al pays, y estu por kavza de un fanatızmo nasyonalısta Islamıko ke se espande en Turkıya,  La segunda, es para los ke ayinda no entienden ke mezmo la assimilasyon, mezmo la adopsıon del İslam no los salva del antisemitizmo .

‘’ Kada dia la konversasıon es : partır y ir, ama ande? Komo, komo enpesar de muevo sin saver la lingua ni meldar ni eskrivir. Esta atmosfera esta ovlıganda mezmo a los ke no pensavan empesar a pensar sovre la emigrasyon y okupa konstantemente los meoyos, lo ke no les da salud, mezmo los aoga.  ’’ Si siempre tenemos ke pensar de irmos de aki, komo podemos tomar plazer de la vida? Komo podemos tener relasyones korrektas kon la sosiedad en la kuala bivimos? Bivir kon el sentimiento de tener un pied afuera mos aze sintir ayinda mas estranjeros al payis. Komo si esta tierra ande nasimos y kresimos, bivimos syenes de anyos , es un lugar de vakansas ke kuando se terminan ay ke boltar a kaza. Al lugar de las figuras de amigos ke se fueron devemos de mırarmos a las karas kon sonriza y bıvir en solidarıdad y apoyo uno al otro.’’ Ansi dize Nesi Altaras.

Eya  termina su letra kon estos biervos ‘’ Yo no kero sintirme ansi. Kero ser optimista y pensar ke sera possible de fraguar mı vıda en Turkiya,  ma no esto  arrivando a kreerme ke se puede realizar’’

No es possible de no apresyar la sinseridad de esta ijika.Falta en eya akel orgolyo de ser Judia y de las realizasyones del Estado de Israel .   Ma ay ke dizirle, ke la Turkiya de oy no es la Turkiya de dos jenerasyones de antes, deshar la Turkiya no es del todo fasil, ma esto tiene kavzas objektivas. La emigrasyon es la konsekuensıa de varıos faktores, donde el prınsıpal es la estabilisyon del Estado Judıo, ke ekziste y yama a todo Judıo ke no puede bivir komo lo merese en la dıaspora. Los yama y los ayuda a sus ıntegrasyon, les asegura salud y vejes, kaza y echo ansı ke una edukasyon ekzemplaria a las kriaturas.Una vida mas difisil ma muncho mas interesante.  La alternativa de otros payses tıene muy munchos desavantajes, el prinsipal siendo el manko de famiya y amigos, kale tener moyenes fınansıarıos ımportantes para asegurarse lo ke Israel puede dar sin ser mılyonarıo. La distensia a la Turkiya es pokas oras de avion, kuando las Amerikas son tanto leshos. No kero avlar del pasaporto Espanıol, payis ande el antisemitizmo y terrorizmo no mankan.

Es un malor de ver en los messajes de kadenas sosyalas (exemplo Facebook)  siertos Turkanos de İsrael ke se manifestan kontra el Judio de Turkiya ke ayinda no puede desharla y tiene ke bivir ayi , y se esfuersa de no attirar las tendensias antisemitas ayinda mas. Todos konosen la polıtıka Turka desde la fundasyon de la Republıka, y las leyes konra las minoridades. Y lo ke se paso en Trakya, el Varlik Vergisi y los kampos de Ashkale.  La prova es ke de kuaje 150000 mil abasharon a 10000. El avenir de los ke kedaron es kurto del punto de vısta demografıko. Si keres konverserlos a azer Aliya, dales a konoser a Israel y al Judaismo. Desha estas insultas, segun estamos vıendo ke eskriven algunos . Porke este estilo no enkoraja a akel Jud’o en Turkiya, preokupado por su avenir , sus hesitasyones y  no tiene otro remedyo ke esperar su destino  en Turkiya .

Selim Amado                                                Sept.25, 2017

 

Tags:

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM

Tel: +972 36582936
Fax: +972 36573894

turkisrael@gmail.com

ADRES

Mohrey Sigariyot 7 Bat Yam - Israel

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon
İletişim ve faaliyetler hakkında bilgi almak için