El Antisemitizmo

September 23, 2017

  • Si demandamos la kestion a la persona la mas simple, “Kualo es el Antisemitizmo?”

    vamos a resivir la repuesta muy normala : “es la antipatia a los Djudios”. Todos tambien

    savemos ke los puevlos (semitas= Bnei Shem) son los Djudios I los Arabos. Nunka se

    tiene sentido ke si a uno no les simpatiza los Arabos, ke lo yamen “Antisemita”.

    Fue kon el Kristianizmo ke empeso la enimistia a los Djudios. Los Kristianos por seguro

    savian ke Yeshu era Djudio, no pardonaron a los Djudios ke no akseptaron ke Yeshu era

    el Maschiah, lo ke es la baza de sus kreensia. Ma agora ken pensa ke ke el Antisemitizmo

    es la kontinuasion de la akuzasion ke somos mozotros ke lo matimos en krusifikandolo a

    Yeshu. Sovretodo despues ke el Vatikan mezmo deklaro ke historikamente esto no es

    verdad. No vamos a avlar de las akuzasyones de matar antes de Pesah a un ijiko kristiano

    I mesklarlo kon arina para azer matza (meurtre rituel), ni de la kreensa ke los Judios se

    tienen por ser superiores a otros por ser el puevlo eskojido.

    El antisemitizmo moderno nasyo en la Evropa del siglo 19, transformando el viejo

    antidjudaizmo kristiano en un movimiento ke se oppoza a la emansipasion de los Djudios

    ke se realizo en la Europa desde la Revolusyon Franseza, I ke yevo a los Djudios a

    integrersen en los payises I komunidades en las kualas bivian, lo ke los rendia invizibles

    en tanto ke Djudios. Esta emansipasion tenia su desaventaje, su paradokso, porke kreo un

    mitos, una falsa opinion ke el Djudio, sin azerse remarkar estava en todo modo de lugar

    para ekzersar su influensia sekreta. El antisemitizmo era la ekspression del miedo del

    mitos del poder sekreto de los Djudios. Kon sus kontribusion a la sensia, a la ekonomia,

    los Djudios eran responsables de la Modernita ke vinia a la Evropa, ma no se vian.

    Paresian Franseze, Alemanes, Belgos etc. Ansi se desvelopo , al lado del rasizmo de

    orijina koloniala –kere dizir de ver komo inferiores a los puevlos kolonizados por la

    Evropa en la Afrika o en la Asia, una antipatia mesklada de espanto enverso los Djudios,

    ke fueron konsiderados komo una rasa. El antisemitizmo fue un rasizmo kontra los

    Djudios, ke profitavan del liberalizmo I de la emansipasion para dominar segun sus

    espanto, la sosietad Evropea. Si el puevlo kolonizado era inferior, el se topava leshos I

    tenia otra kolor de kuero, ma el Djudio, ke desde la Inquizisyon lo akuzavan de no tener

    la puredad de sangre (porke mezmo el ke se se aziya kristiano no era sinsero) biviya

    alyentro del mundo kristiano I ansi era el mas perikolozo. Este espanto era la baza del

    Antisemitizmo, ke kavzo ke Herzl tenga la idea del nasionalizmo Djudio, ke es el

    Siyonizmo.

    Este antisemitizmo ke niyegava al Djudio el derecho de bivir en igualidad kon otros

    miembros de la sosiedad en Evropa, no tadro de transformarse en anti-sionizmo, ke era la

    bushkidad del derecho de bivir independiente entre las otras nasiones, en su propria

    patria. I kuando se formo el estado de Israel, sus politikas fueron kritikadas de toda parte,

    koza ke no uvyera ser echa si se tratava de un kualker otro payis. Es klaro ke si un estado

    defende a sus sivdadinos kontra aktos de terror, o si esta menazado por armas

  • 2

    destrukrivas por sus vizinos, su derecho de defenderse no puede ser kestion. Ma no es

    ansi kuando se trata de Israel. Verdad ke no kale kualifiado de ser antisemita a todo el ke

    kritika al Estado de Israel, Israel es una demokrasiya ovligada de ser avierta a kritikas,

    segun lo vemos en la prensa Israeliana mezmo. Ma el numero I la virulensiya de las

    kritikas a Israel, a su governo, a su parlamento I mezmo a sus tribunals estan tan

    munchas, tan pervertidas, tan sin fondasyon, tan kontinualas, tan lo realas, ke es

    imposible de no ver en eyas un antisemitizmo eskondido detras la kritika del Estado

    Djudio I del Siyonizmo.

    Ansi eskrivio en Sr. Yosef Nigrin en Ladinokomunita, despues ke bolto de un viaje a

    Espania. :” Vos kero kontar un pasado ke pasi en una de las vakaknsas ke pasi en "Costa

    del sol" en Torre Molinos,venimos dos kuples sefaradis origin nasidos de Turkiya i

    bivimos en Israel,primera noche abashimos a paseyar en el sentro entrimos a una butika

    de suvenires, para entendermos avli en ladino kon el butikario, el ombre se enkanto i

    demando de ande venimos i ke lingua avlamos, le dishe la lingua es judeo espaniol, ke so

    de rasa espaniola, ke nasi en Turkiya i bivo en Israel, la primera demanda de el fue, "

    deke estash matando a los palestinianos " miri ke esto en frente de un antesemito, le dishe

    "tu estas viendo solo una parte estas juzgando los judios sin saver nada",despues de una

    diskusion larga le demandi ande nasio ? , me disho kes Maruekano le dishe esta es la

    kavza ke sos antesemit sin pensar ke tu mezmo sos de rasa semita, al kavo me demando

    pardon i salimos komo amigos antes de esto mos disho , "vos los judios keresh komer el

    mundo entero la Amerika tambien vosotros es ke la dirijesh" i yo le rspondi "bueno" i

    kedo kayado.

    ( la sr" Judith Cohen, eskrive en la espania no ay muncho antesimitzmo,

    ay muncho ante israelizmo - ke es la diferrensya los israelianos no son judios semitos ?”

    De este mensaje se ve kualo es agora el grande problema de Djudio. No el ke es riko, no

    el ke mato al Kristo, ma el ke no esta deshando bivir al Arabo, el ke apoye a la Amerika

    ke okupa tierras de los Arabos, I ke kere dominar almundo !

    La Profesora Dina Porat de la Universidad de Tel Aviv responde a la kestion “ Kualo es

    antisemita” en un artkolo, onde dize ke en Enero 2005 fue akseptada, en una konferensia

    internesyonala ke tuvo lugar en Kordova, konferensia kon 55 payises representados en el

    kuadro de la Union Europea en Viena para luchar kontra el rasizmo I la xenophobia de la

    Organizasion para la Seguridad I Kooperasion Evropea (OSCE), la definisyon sigyente :

    “El Antisemitizmo es, un sierto sentimiento ke tienen los Djudios, ke se puese eksplikar

    komo la enimista, el odio (ha sin’a) ke tienen enverso los Djudios I ke se ve kon

    manifestasiones retorikas I fizikas, kere dizir en dichas I en echas, kontra personas

    Djudias o non Djudias o sus propriedades, o las institusiones de las komunidades

    Djudias, relijiozas, eskolas, simeterios, etc.” A esto se puede adjustar ke estas

    manifestasiones pueden ser kontra el Estado de Israel, ke es konsiderado komo el

    kollektivo de los Djudios.

  •  

  •  

     

     

     

     

     

     

     

     

     

     

  • 5

    “partkularismo, persistensia, perversion I ambision” Los enimigos de los Djudios lo

    nombravan a Voltaire para provar, ke no solo eyos tenian una relijion ke no era Buena,

    ma ma ke sus karakter de baza tambien no era bueno, ke son de kavesa dura, ke no trokan

    sus ideas, ke son intolerants, segun esta eskrito en sus Biblia.

    Estos argumentos fueron empleados en los debates intensos ke uvo en Fransia en los

    prisipios de la lucha para la Emansipasion,, del anio 1780 al anio 1814, sovre la kestion si

    los Djudios meresen de ser akseptados komo Buenos sivdadinos (citoyens). Es ke los

    Djudios ivan a ser ( un estado alyentro del estado – segun fue dicho por el filozofo

    Aleman Fichte en 1793) si les seria dado el derecho de tener possession de sus propria

    tierra, de adjuntarsen a las gildas professionals, de lavorar en lavoros diversos afuera de

    los gettos en los kualos moravan, es ke ivan a ser konsiderados (sivdadinos) komo todos?

    En Fransia, entre algunos Katolikos I militaristos anti-republikanos, la Revolusion

    Franseza era vista komo la inkarnasion del mal, de lo ke es malo, ke fue planeada por

    fuersas misteriozas anti-Fransezas I anti-Kristianas. La Alliance Israelite Universelle, ke

    era organizada para la proteksion de los Djudios, tenia su sentrala en paris I fue atakada

    komo el sentro de la konspirasyion internasionala Djudia kontra la Fransia. En 1886, el

    trakto antisemitiko de Edouard Drumont, La France Juive, fue imrimida 114 vezes en un

    solo anio I avyo el kamino a una propaganda antisemita de muy grande magnitud.

    Drumond tambien arebashava al Djudio ambisiozo, komersante enfrente del Ariano, de

    sangre pura, heroiko I de konfiensa.

    Un ofisial military Djudio-Fransez, el Kapitan Alfred dreyfus, fue arrestado I kargado

    (akuzado) en 1894 de aver vendido sekretos del estado a la Alemania. Dreyfus fue

    kondanado sovre baza de pruevas falsifikadas I fue deportado. Despues de su proseso

    salio en medio ke las pruevas ke lo yevaron a la kondemnasion I deshonorasion eran

    falsas, I ke Dreyfus era inosente , su kondeno fue anulado. Malgrado esto, el kavzo

    Dreyfus inflamo el odio, la enimistad enverso los Djudios de munchos de los

    konservativas I reaksionarios Fransezes. Este proseso diviso a la Fransia

    politikamente, I kavzo la erupsion de la violensia anti semita en el payis.

    Ironikamente, el Antisemitismo ke salio en medio kon el proseso Dreyfus sirvio de

    motivasion a un jurnalista Austrio, Theodor Herzl, de organizar el movimiento Sionosta.

    Este movimiento termino kon el establisimiento de una patria Djudia, el estado de Israel,

    en 1948.

    El Antisemitismo en Russia

    En Russia la mayoria de los Djudios eran ovligados de bivir en rejyones definidas, I no

    en todo lugar. Esta restriksion fue establisida por el governo Ruso en 1792, I konsistiya

    en siertas partidas de la Polonia Rusa, de la Belorussia, de la Criea, de Besarabia I de

    Ukraina.. Avia otras restriksiones tambien para Djudios, pogroms, I de mas salio un mito

    de konspirasion Djudia ke kavzo ke los emigrados Rusos en Fransia inventen , lo ke se

    yama (Los Protokoles de los viejos de Siyon). Estos protokoles mintirozos fueron

    inventados durante el djuzgo de Dreyfus en Fransia, kon la asistensia de la polisiya

    sekreta Ruso.

  • 6

    Kualo dizen los famozos protokoles ? Pretenden ke ekziste una konspirasion sekreta

    internasionala de los Djudios,para tomar poder del mundo entero, de empesar I kavzar

    guerras I depressiones-krizas ekonomikas. Los protokoles pretendiyan ke estos son las

    desiziones ke fueron tomadas del enkontro en 1897 de los lideres Djudios, yamado el (El

    Primer Kongreso Siyonisto Internasional), ke fue inisiyado por Theodor Herzl. Esta

    falsifikasyon en una lingua mal eskrita I imposible del empesijo asta la fin. A estos

    Protokoles absurdos, inkreyibles, muncha djente se kreeron, I los Djudios fueron el (sair

    leazazel – la kavra ekspiatoria) para los ke bushkavan un responsible a todos los males de

    la sosiedad.

    Este dokumento falso fue trezladado a 7 linguas, I de ves en kuando esta re-imprimido

    mezmo en nuestros dias.

    Es solo en 1921 ke un jurnalisto Inglez de la London Times ke deskuvrio ke la konseja

    kontada en los Protokoles era un plagiarizmo, un kuento rovado de dos konsejas eskuras

    imajinarias, la una ke era una satira sovre Napoleon eskrita por un autor Fransez ke se

    yama Maurice Joly, I la otra de una konseja tomada del Aleman Herman Goedsche. El

    danio ke izo esta falsifikasion no pudo ser efasado asta nuestros dias.. Los Nazis se

    bazaron sovre los Protokoles de Siyon para djustifikar sus persekusion de los Djudios, I

    la publikasion massiva de este dokumento falso en el mundo entero ensendio las flamas

    del Antisemitizmo, asta ke esta mentira fue provada I se empeso a sintir. Ayinda oy se

    publika I se ve ke grupos ke odian, ke no pueden ver a los Djudios, distribuan el livriko

    de (Los Protokoles de los Vieyos de Siyon) .

    El romantisizmo Aleman I el Nasionalizmo

    En reaksion al rasyonalizmo del siglo 18, el romantisizmo glorifio los sentimientos I

    siertos karakteristikos de los tiempos pasados. En Alemania, estas ideas fueron

    espandidas por Johann Gottfried von Herder, August Wilhelm von Schlegel, Johann

    Gottlieb Fichte I Friedrich Melchior Grimm. En 1808, Fichte dio una seria de “deskorsos

    a la nasion Alemana” en las kualas konsejo a los puevlos ke avlan el Aleman, de rezistir a

    los Fransezes, I avlo de la superioridad de los Alemanes. Durante este tiempo, Ernest

    Arndt I Friedrich Jahn propozaron I exaltaron la nosion de (Volk) mistika, en la kuala el

    Djudio no puede tener lugar.

    Despues del kongreso de Vienna de 1815, las esperansas Alemanas para una

    soverenyidad nasionala ensima de otra nasion ke avla Aleman, los Austriakos, fueron

    refuzadas por el politico Ausrriako el Prinz Klemens wenzel von Metternich. Ansi

    empeso una reaksion de parte de los Alemanes djuntos kon atakes violentes kontra los

    Djudios en munchas sivdades de la Alemania.

    El Antisemitizmo rasial I el mito Ariano

    Los teorisianos del rasizmo en el siglo 19 fueron los primeros ke konfundieron el termino

    Arian, ke es una konsepsion linguistika, kon lo ke sinyifika una (rasa). Tambien el biervo

    (semitic) tiene una sinyifikasyon linguistika. Un personaje interesante, Arthur de

    Gobineau (1816-1882) ke es uno de los primeros teorisianos del rasizmo, empleo la

    antropolojia, la linguistika I la historia para formular una teoria,en la kuala el biervo

    (Rasa =geza) eksplikava virtualmente todo en la eksperiensa humana. En su ovra (Essay

  • 7

    on the inequality of the human races =Tratado sovre la inegualdad de las rasa humanas)

    Gabineau pretendiya ke ke el mezmo I los aristokrates Fransezes komo el mezmo son

    superiores a las masas de los Fransezes, porke los aristokrates tienen sangre Ariana pura.

    El disho ke los evenimientos historikos ke izyeron la historia son determinados por una

    ley de fierro de la Rasa, I lel destino de la humanidad depende de la natura I se eksprima

    por la rasa. La Historia muestra ke la sivilizasyon korre I se desvelopa por kavza de la

    Rasa Blanka” I la djoya de la rasa blanka es el (Ariano), ke pudo sovrebivir komo una

    rasa superiora a las otras. Ma el kazamiento entre rasas diferentes estan menazando la

    ekzistensia I la kontinuasion de esta rasa superiora.

    Lo ke eskrivio Gobineau fue tresladado al Aleman 40 anios despues I tuvo una influensia

    muy fuerte sovre los Alemanes, komo el kompozitor famozo Richard Wagner I su yerno,

    Houston Stewart Chamberlain, ke el mezmo influenso la teoria rasiala Nazista.

    Despues de la viktoria Alemana en la Guerra Franko-Prussiana (1870) ,la Almania fue

    finalmente unida basho la politika (sangre I fierro) de Otto von Bismarck. Ansi el

    nasionalizmo Aleman agora se podia permetir de alesharse de lai ideas liberals I

    demokratikas. El Reich Aleman muevo de 1871 estava dominado por la Prussia, por

    Junker, I por interesos militaristikos.

    En 1878, el Partido Sosial Demokratiko fue deklarado illegal, I los esfuersos

    demokratikos fueron atabafados. En los 1890, la demokrasia politika fue blokada por la

    suvida en el poder de los industrialistas Alemanes I desviada por la ekspansion

    imperialista. Este periodo koinsida kon un Nuevo siklo de antisemitizmo, kon los Djudios

    akuzados de manipular a los kazalinos I komersantes chikos para rezistir I opozarsen al

    orden ekonomiko I sosial tradisyonal . Los Djudios fueron deklarados komo responsibles

    de la kriza ekonomika serioza ke uvo en 1873. En este mezmo anio, el jurnalisto

    Wilhelm Marr ke invento el biervo “antiSemitizmo” eskrivio un artikolo : (La Viktoria

    del Djudaizmo sovre el Germanizmo), ke tuvo muy grande sukseso I ke fue publikado 12

    vezes en 6 anios. En empleando las nosiones de la Rasa I del Nasionalizmo, Marr

    pretendio ke los Djudios en el 19.en siglo arivaron a ser “el primer poder grande en el

    Oksidente”. El akuzo a los Djudios de ser liberals, de ser un puevlo sin raizes, I de aver

    Judaizado a los Almanes de una manera ke “no pueden mas ser salvados”. En 1879 el

    fundo La Liga para el AntiSemitizmo.

    Verso la fin del 19.en siglo, los partidos politicos en la Evropa, espesialmente en la

    Alemania, emplearon el AntiSemitizmo en sus platformas politikas de sus partidos. El

    primero fue el Partido Kristyano-Sosialista de los Ovreros, fundado por Adolf Tricker en

    1878.

    Tricker, ke era un ombre de relijion del palasio imperial, akuzava a los Djudios de

    todo echo ke no reushia, de dominar los movimientos liberals politicos, I por ser “una

    gota de sangre estranjera kon poder destruktivo, en el kuerpo de la nasion Almana !”.

    El se adereso a las klasas mas desfavorizadas sosialmente I ekonomikamente en la

    Alemania, ekzaktamende komo lo izo mas depues Adolf Hitler, en asegurandoles un

  • 8

    mijor status en un estado muncho mas fuerte. En 1879, Stickerse adjunto a Marr I

    fundaron la (Liga para el AntiSemitizmo).

    En 1879 el historiador Heinrich v. Treitschke empeso a eskrivir ke los “Djudios son

    muestro mazal basho, muestra “malchance’, I ke ekziste una inkompatibilidad totala entre

    el esprito Aleman I el Djudio. En 1881, el filzofo Eugen karl Dihring eskrivio el “ La

    kestion Djudia komo kestion Rasiala, Morala I Kulturala “ en el kual pretendio ke los

    Djudios son los ke kavzan el deklino de la Alemania, I ke konstituen una kontra-rasa, ke

    ni kon avlar, ni kon asimilasyon no se puede trokar. Su influensia sovre los estudiantes de

    la s universidades era muy muy fuerte.

    En 1893, 250.000 votantes enbiaron 16 deputados (entre 397) antisemitas I komitidos a

    azer leyes antisemitas , a la Reichstag (parlamento) Ameman. En 1900, H.S.

    Chamberlain, un Inglez ke se avia instalado en Alemania eskrivio su livro (Las

    Fundasiones del 19.en Siglo), en el kual el izo la idealizasion de la rasa I alma Alemana,

    ke aze a los Almanes ke son onestos, loyales, I laboriozos. I en kontrasto, los Djudios son

    materialistas, legalistikos, sin toerensia I moralidad. Estos dos puevlos estavanengajados

    en una lucha, en un peleo, ande una parte solo devia de ganar, la otra devia ser vensida.

    Este es el livro ke dio a los Nazis el teksto para susn mitos rasial I ke se vendio en

    kuantidades enormes en toda la Alemania.

    Durante la Primera Guerra Mundial, kuando los Almanes empesaron a entender ke de

    esta Guerra no van a salir viktoriozos, empeso una nueva kampanya de antisemitizmo, los

    Djudios fueron mostrados ko mo la kavza de sus piedrita. Dizian ke los Djudios son los

    ke kitan sus profitos de la Guerra, ke no partisipan a los kombates, I ke son los

    reponsables de lo ke faltan kozas de komer en los magazines. La literature antisemita

    empeso a inchir las kalejas.

    La piedrita de la Guerra por los Alemanes en 1918 fue prezentada komo kavzada por los

    Djudios I los sosialistas. El Jeneral Alman Erich Ludendorf djuntos kon Adolf Hitler

    miraron de azer un (coup d’etat) en1923 I dnunsiaron a los Djudios ke tienen (esta

    superstision ke se yama Jehova). El tratado de Versailles ke metyo fin a la Primera

    Guerra Mondial kavzo kondisyones muy duras para la Alemania, una hiper inflasion

    destruktiva I muncha miseria krearon una atmosfera muy antisemita. En 1922 la Almania

    tenia un ministro del eksterior yamado Walter Ratthenau ke fue assasinado. Partidos de

    derecha I entre otros el partido de Ovreros Almanes (ke mas despues se yamo el Partido

    Nazista) fueron kreados, al kual Hitler entro en 1919.

    En 1920 el partido nazi publiko su platforma kon 25 puntos: dizyendo ke un Djudio

    nunka podra ser membro del puevlo Aleman. Los ke se sintian humiliados de aver

    pedrido la Guerra se adjuntaron I fueron los mas ekstremistos de este partido Nasional

    Sosialisto. Se formaron grupos para militaristos yamados Stromtoups (Sturm Abteilung)

    empesaron a ser violentes, sirvieron de eskola de asasinos ke mas despues ivan a

    eksterminar a los Djudios.

    En 1930, uno yamado Alfred Rosenberg, le dio a konoser a Hitler los Protokoles de los

    Viejos de Siyon, I eskrivio un livro (El Mito del Siglo 20) onde insistio ke la rasa

  • 9

    Nordika a la kuala apartenian los Alemanes era la rasa superiora, I kijo ke se forme una

    Kilisya Nasyonala Alemana bazada sovre la rasa I la puridad de la sangre. El mesmo

    anio, el partido Nazi resivyo 6 milyones de votos en las eleksiones, kon 107 deputados, I

    se izo el Segundo grande partido de la Reichstag.

    El antisemitizmo Evropeo, kon sus versiones teolojikas I rasistas, esensialmente no azian

    parte de las tradisyones del Islam, de su manera de pensar I kultura. Ma de una forma

    inkreible, despues del Sionizmo, todas las invensiones de los Nazistos I sus antepasados

    fueron adaptadas I Islamizadas. Las mentiras prinsipalas, komo entosegar pozos de agua,

    inventar pasajes del Talmud, la kalomnia del ritual de Pesah, el odio de los ke no son

    Djudios, el inventar el Masonizmo I otras konspirasyones para dominar el mundo, todo

    esto tomo un aspekto Islamiko I mezmo se toparon kuotasyones en el Kuran. El mundo

    Musulmano es oy es el sentro del antisemitizmo el mas virulente ke pudo ekzistir desde

    los Alemanes, tanto ke mesmo la Evropa empeso a renderse kuento ke no es solo el

    problema de los Djudios o de Israel.

    El Islam tiene una akuzasion klasika, ke la Tora I en Evanjilo pedyeron sus verdad por ke

    los Djudios I los Kristianos lo falsifikaron, I en trokando la Tora los Djudios inventaron

    ke eyos son el puevlo ke eskojo el Dio I ke la Palestina les apartiene, I ke lo ke azen es

    kontra la humanidad I el Islam, kontra de los Arabos. Djuntos kon esto, uno de los

    krimenes de los Djudios I Sionistos, es ke son el instrumento de la penetrasion, del

    kolonializmo Amerikano I Evropeo. Ke tiene por buto de embatakar la kultura islamika,

    I kel Djudio nasyo kon buto de azer danio al Islam.

    En tiempo de los esforsos Djudios de tener independensia, I sovretodo despues de la

    Guerra de Independensia de Israel, ke en realidad es la oposizyon Araba al plano de

    partision de la UN en Nov.1947, la piedrita I humiliasion de los Arabos kavzo un

    espandimiento del Antisemitizmo de stilo Evropeo entre los Arabos. Se abandono la

    historia de koekzistensia de las relijiones Islamika I Djudia en Espania, I fueron

    adoptdaos laos temas familiars del Antisemitizmo Evropeo komo los Protokoles, el

    pretendido ritual de Pesah, las konspirasiones internasionalas etc. en las eskolas, en los

    jurnales de una manera ekzajerada, asta ke estamos podiendo oy ver aktos de terorizmo I

    kavamente, lads deklarasiones del Presidente del Iran, ke no es Arabo, ma ke al nombre

    del Islam kere ke desapareska Israel, pretende ke la Shoa es una mentira, etc.

    Puedeser ke estas ekzajerasiones I menazos de Ahmedinejat I el terorizmo internasional

    estan kavzando ke el mundo se desperte I entienda ke el Antisemitizmo no es solo el

    problema de los Djudios I no es koza rasional ke tiene bazas kreyibles.

    10

    Un otro malor es, ke kon la influensia de publikasiones tanto antisemitas I tanto hostiles a

    Israel, estan saliendo Djudios ke se estan empesando a kreer I refuzar el Sionizmo, I la

    djustedad de la kavza Djudia.

    Kero terminar en akodrandomos ke el antisemitizmo era un perikolo para el Djudio, I izo

    muncho danio en la historia, lo ke vino asta el Holokosto. Todo arivo kuando no

  • 10

    teniyamos el estado de Israel. Dizir ke en el futuro no avra Antisemitizmo, no me parese

    reel. Esperaremos ke despues de agora se entiendera ke el Djudio no era ni sera lo ke

    pretendieron los Antisemitas, ke seygan klasikos o ke seygan modernos.

    Selim Amado, April 2007–04–24

    Bibliografiya :

    Modern Antisemitism : www.remember.org/guide/History/root.modern.html

    What makes an antisemite,

    www.haaretz.com/hasen/objects/pages/Print/ArticleEn.jhtml?itemNo=818365

    The Return of Anti-Semitism , by Gabriel Schoenfeld

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon