PASAPORTES PARA LOS SEFARADES


Keridos lektores,

El anyo pasado La republika Espanyola i Israel fiestaron 30 anios de rekonosimiento i a esta okazion en el Instituto SALTI de la Universitad Bar Ilan se organizo durante el 24en MARATHON anual un enkontro entre las otoridades Espaniolas en Israel i los miembros del Instituto.

Aki vos transmeto en partida el diskorso de aviertura ke ize a esta okazion.

“Su ekselensia Don Fernando Carderera Ambasador de Espanya,

Profesor Eliahu Assis dekano de muestra fakulta,

Keridas i keridos profesores, estudiantes, amigos del Instituto, onoravle asistensia,

Buenos días.

Muestra esperansa i muestra larga pasensia dio sus frutos. Finalmente el pueblo Espaniol a traverso su Rey i governo aze poko tiempo rekonosio la tragedia ke bivieron los djudios espanioles en el sieglo 15 i ansina les otórga el derecho de tener dos suditansas i de retornar a Espania si lo dezean. Los djudíos sefarad, espanioles sin patria, durante mas de 500 anios dospues del egzilo forsado bivieron sea en Evropa sea en el medio oriente i finalmente retornaron a sus tieras ancestral, a Israel. Oy en dia la mayoriya de los sefarades biven en Israel et un pursantaje minor en diferentes países del mundo. Porke la Espania metio tantos sieklos a rekonoser su mea kulpa ¿ La repuesta esta en el antisemitismo rasial i relijiozo ke se desvelopo antes i durante la perioda de la konkista i en los anios ke sigieron la deportasion de los djudios. Mas dospues los konveros ke kedaron a bivir en Espania krearon un selo i dezeo immensyo al seno del pueblo espaniol ,del noble fina el payzano el mas simple,porke eyos tenían komo en el pasado siempre la fakulta de ser kreativos en los sektores importantes de la vida española. Esto pusho a krear el statuto de limpieza de sangre ke paralizo toda la mobilita sosiala. Los istorianos mos ambezan ke el oro de las Amerikas resivido abondantamente komo bindision divina dospues de la likidasion de los murishkos i djudios no abastesio durante sieglos al desvelopamente del país porke no fue empleado en justa manera. Una atmosfera de inimista fue kreada kontra el ke reuche ekonomikamente i sosialamente el kual era sospechado de tener sangre djudia i dunke inimigo de la fey kristiana. La amenasa de la Inkizision kreo un espanto general en la povlasion i es ansi ke miles de espanioles se sintieron ovligados de expatriarsen. Esto kontinuo fina el 17en sieglo i mismo dospues malgrado ke no avia mas ni un djudio biviendo en Espania. Henry Mechoulan investigador en CNRS fransez afirma ke la pureza de la rasa de los nazistas tiene la misma obsesion ke la pureza de sangre española. De mi punto de vista solanelmente demano de la nasion española moderna dospues de aver demandado exkuzas por el pasado, de eskabuyirse definitivamente del antisimitzmo i de el anti Israelizmo ke dainda perdura en el país. Esto será un largo proseso sosio-politiko onde las akademias tienen de tener sus rolos. 30 anios de rekonosimiento del estado de Israel por Espania es kurto para perdonar las viejaz inimistades ma bastante largo para aboltar la pajina i kreaer una verdareda amistisa emosionala entre los Espanioles i los sefarades Israelianos. Sin duvda la kultura komuna mos ayudara en este respekto.”

A esto keria ajustar mi penserio para pueder adelantar el proyekto de ‘pas’entre las dos nasiones.

Komo lo pensó, paramozotros sefarades israelianos seriá mas interesante de pueder tener renkontros al nivel del grande publiko i ansi organizar sea en Israel sea en Espania mostras o konsertos publikos de artistas de los dos paizes, distribusion de bekas para los ke keraran estudiar i investigar en las universitades espaniolas o israelianas al sujeto del pasado de los djudios en tiera Iberica. Esto todo deve ser organizado i finansiado solo por las institusiones espaniolas . Es ansi ke la Espania meresera un pardon del puevlo djudio. En dando a un Israeli solo la suditansa espaniola pensó ke no es koza grande o ke se izo un esforso marjinal para solisitar ekskuza del pasado. Oy el sefarad israeliano tiene un pasaporte valorozo i a la eksepsion de los paizes inimigos de Israel puede viajar a kualker parte del mundo sin nesesitar visas. Dunke pokos serán los ke demandaran la nasionalidad española o iran a bivir en Espania, aktualmente topándose en difikultad ekonomika. Ademas el sefarad Israeliano guadro en su memoria, ke sus antepasados en sirkonstensias trajikas peryeron todos sus derechos de ser espanioles i ke fueron rovados de sus bienes materiales. La istoria triste no se kambiara solo kon jestos sembolikos si no ke al ejemplo alemán el kual en pagando endamnitades a los ke sufrieron del nazismo kreo una amistad mueva entre los dos pueblos, bazada sovre la konfiensa. Ke diferensia ekziste entre los dos evenimientos disgrasiados; a mi perspektiva personal digo son semejantes. Ademas muy simple: komo lo dishe en mi diskorso, la Espania metio mas de 500 anios a akodrarse del danio ke kavzaron sus dirigentes antipasados al pueblo djudio . La ekskuza devria ser akompaniada de faktos konkretos materiales “Al ke kera entender un saludo” se dize en fransez.

Dr.Selim Salti

Bizi Takip Edin
  • Facebook Basic Square
  • Twitter Basic Square
  • Google+ Basic Square