SEFARADI – ESHKENAZI

No ay menester de ser pratikante, un Judio puede demandarse kuala es la diferensia entre Sefaradim y Eshkenazim?

La diáspora de kuaje dos mil anyos izo ke aygan diferensias en la interpretasion de la mezma Tora, del mezmo Talmud. Tanbien el faktor geografiko y la ambiensa y payses en los kualos bivyeron los Judios. La lingua de los Judios de la península Iberika fue el Judeo-Espaniol o Ladino, i akeya de los Judios en Europa el Yiddish fue influida por el Aleman, y el Ebreo. Kada una konteniende biervos y ekspresiones proviniendo del ambiente lokal onde eyos bivyeron. En el mundo Eshkenazi, una manera de preservar el Judaismo fue la adaptasion de vistimientas i apparensia espesialas , ke se encuentran asta oy es las komunidades ultra-Ortodokses, los Haredim, kon el eskopo de no pareser al Goy.

En el mundo Sefaradi, kere dizir de los desendientes de los ekspulsados de Espania-Portugal, apparensia y vistimientos fueron adaptados totalmente al lugar de bivir, sin tener miedo de pedrer elkarakter Judio, y en perkurando mezmo de avlar las linguas komo el Arabe ( en parte de la Afrika del norte), el Turko, el Grego o el Bulgaro, el Serbo-Kroato (en los Balkanes y en Yerushalayim) todo en teniendo al Ladino komo lingua madre.

El yerro grande fue de yamar Sefaradim a todos los ke no vinieron de la Europa, en inkluendo a todos los Judios del oriente: de payses Arabos del Medio-Oriente y de la Afrika del Norte : komo Teimanis (de Yemen), los Irakianos, los Marokanos, Tunisianos, Algerianos, etc. El termino ekzakto devia ser Mizrahim (si mezmo en la Afrika del Norte bivyeron tanbien ekspulsados de Espania).

El manadero de este yerro es la nominasyon de un segundo Gran Rabino en Erets Israel en tiempo del mandat Britaniko, kuando el “High Comissionner” estabilisyo un Rav Rashi (Haham bashi) Eshkenazi al lado del Rishon Letzion ( el Rav Rashi) de los Sefaradim. En 1921 el Gran Rabino Eshkenazi fue Rav. Avraham Yitshak Kook, y el Rishon Letsion el Rav Yaakov Meir fueron nominados komo 2 Gran Rabinos ke respresentan la Autoridad religiosa Judia. Esta distinksion fue konservada por el nuevo estado de Israel, en el kuadro de la preservasion del “staus quo” relijiozo.

Ma ekziste una diferencia kapital entre las dos interpretasiones de la alaha Judia entre los chefes spirituales de los Eshkenazim y de los ke no son Eshkenazim: yamados por yerro a todos Sefaradim. Esta differensia es muy interesante, según una konferensia ke dio en la Yeshiva University en los anios 70 el Rishon Letzion de Israel, el Rav Ovadia Yosef z”l.(*)

El rabino sefaradi Rabi Hayim Yosef David Azulay (Hidah) dize kelos Eshkenazim tienen tendencia de preferar la kualidad de “gevura o fuersa”. Eyos ven las restriksiones de la alaha komo ekspression de amor al Dio. Las demandas kategorikas de la alaha demandan sakrifisio personal y heroismo para ekzekutir los mandamientos de la Tora. Al kontrario, la tendensia de los sefaradim es la tolerensia. En otros biervos, uno sigye la eskola de Hillel ( Hesed-kompasion) y eskoje el kamino mediano (Dereh amelahim), koando el Eshkenazi sigye la eskola de Shamai, la de observasion strikta, kategorika, de “gvura”. El Rav Ovadia Yosef z”l adjusto ke el dezearia ke todos adopten la eskola de hillel, de tolerensia y kompasion.

El Rabino Sefaradi de New York, Rav Marc Angel, dize (*) : “Otro titolo del Rav Sefaradi es Haham. Por seguro ke el Haham deve de konoser los tekstos sakrados del Judaismo, ma este titolo mostra ke el deve ser de “hohma” de seveduria y de buen-senso. Uno ke konose la psikolojia de la persona : el toma sus ideas y konosensias de la Biblia, del Talmud, del Midrash, de la Kabala y de los eskritos de Musar (rtika), ma tiene este dono de saver komo aplikar estos tekstos a las situasiones de la realidad de la vida. El tiene una inklinasyon rasyonala y mistika en mezmo tiempo, save ke son los problemas ke tiene la sosiedad onde bivimos.”

La comunidad ultra orthodoksa Eshkenazi mezmo oy en dia no aze nada sin aderesarse al Rav. Kualo azer, ke doktor konsultar, komo vistir, kon kem kazar? etc. En el mundo sefaradi (verdadero) el Judio se adereso al haham para ke le amostre kamino en kestiones muy personales y humanas, estando seguro ke la repuesta será en konforme a la ley y a la logika.

Kuando al Mizrahi, munchas vezes vemos la tendencia de estudiar en las yeshivot de los haredim, vistir komo ellos akeyos chapeos y akeyos kostumes pretos komo uniforma y tener mesmo barba y buklas komo sinyo de observasion de psukim de la Tora, sin pensar ke el mundo esta trokando y Erets Israel no parese a la Polonia i no tenemos nada de inferior.

Horozamente ke nuestro retorno a Israel va meter fin a esta diferensiasion, kon kazamientos entre Eshkenazim y Sefaradim, y kon el konosimiento ke somos un solo pueblo.

Selim Amado

Rosh Haayin Sept. 2017

(*)Models of Rabbinic Leadership, Rabbi Marc Angel 1975

Another title applied to Sephardic rabbis was “Hakham.” A Hakham was certainly expected to be learned in the sacred texts of Judaism—but the title implies more than mere erudition. It implies wisdom. The Hakham was a wise man who had keen insight into human psychology; he could draw on the Bible, Talmud, Midrash, Kabbalah, and Mussar literature, but he also had the innate sense to know how to apply these texts to real-life situations. He had a rational bent and a mystical bent; he was aware of the larger problems and issues confronting his society. People knew they could turn to the Hakham for proper guidance, for counseling on matters of deep concern.