Viaje a Cesme

September 8, 2017

 

La semana pasada estuvimos mi mujer Mimi i yo en Cesme para partisipar a la seremonia de kumple anio de los 80 anios de muestro muy valorozo i serkano amigo Moreno Margunato nasido de Izmir i biviendo en Israel.

Fue una fiesta maravioza kon la partisipasion de su famia i de amigos de Izmir.  Esto fue en mizmo tiempo para mi una okazion, topandome ayi para pueder avlar a los miembros ermanos de la Bene Berit de Izmir  en el 13 Agusto dia de alhad  durante un dezayuno organizado en un kafe afuera de Cesme, del Instituto Salti. 

Komo vos espliko ay una semana el prezidente de la komunidad el sinyor Aji 49 miembros partisiparon a este dezayuno i me se dio la palavra para ke les de a entender el dezvelopamiento ke fue echo en la Universitad Bar Ilan konsernando la kultura sefaradi  i su lingua. 

 Komo saverach el SENTRO fondado por la Fundasion SALTI en esta institusion importante de Israel ,kon sus 8 fakultades i 8 eskolas akademikas a traverso el pais, ke tiene serka 1000 profesores 2000 doktores ansienantes i envestigadores, kaji 30 mil estudiantes, fue transformado kon un akordo mutual del konsilio akademiko de la Universita i de mi Fundasion  en INSTITUTO. 

Es ansi ke el sera mas independiente en sus lavoros, tenera su budjeto privado, puedera dar  diploma de MA i PhD, a su nombre, para los ke reushiran en sus lavoros akademikos.  Bien entendido este Instituto tendra su propio lugar ke se fraguara al seno del kampus de la Universitad. Tenemos al dial aktual la aprobasion  de la direksion jeneral de la Universita komo akel de la munisipalitad de Ramat Gan de pueder fraguar muestro edifisio. La Fundasion Salti finansera todos los gastos de fonksionamento del Instituto por los 20 anios a vinir, ma por kontra le falta los fondos para fraguar.  

Mi famia kerera  topar una famia de preferensia de orijin turka ke finansara el edifisio, ke sera uniko en el mundo . Avizo a toda famia djudia de kual ker parte del mundo ke kerara immortalizar su nombre komo fraguador del edifisio me kontakte.  Mos akodraremos ke el Instituto es uniko oy en dia  i se topa en Israel onde bive la mayoriya de los sefardis ladino avlantes. Esta institusion es i sera la "Yerushalayim" de la kultura sefaradi  i de su lingua  i sovguerdara muestro pasado de kaji 2000 anios.  

 El instituto kuando era sentro a formado 11  elevos en master i diplomado 12 doktores,de los kuales los 9 ensenieran en el Instituto. El es enkavesado por el profesor  Dr.Shmuel Refael, skolastiko briante de famia de Salonik,  eskapada de Aushwitz. En el kadro aktual un de los futuros profesores sera el Dr.Dov Hakoen, uniko espesialista de bibliografia de livros eskritos en judeo espanyol. Todos los elementos ke ambezan la lingua komo akeos ke investigan son de ayedad media i tienen un futuro bastante ancho para formar a sus tornos muevos profesores.  Esto siguro ke mi vizion es justa i se realizera komo la pensi.  Todos los ke keraran partisipar a esta ovra unika son los bien vinidos. 

Ademas vos dizere ke el sentro publika livros komo el Ladinar, i ovras de los miembros del Instituto. Oy en dia una biblioteka de aproksikamente 4000 livros en ladino se topan en el, donde 700 ovras istorikas i ansienas. Por eshlempo la famial Levi del Portugal mos regalo un Meam Loez estampado en 1842 en Izmir en kompleto. La mayoriya de los livros viejos i koleksiones de jurnales ke aparesieron seya en Salonik , en Estambol i mas, mos fueron donados por amigos del Instituto. Inkorajamos a ke los sefaradis a traverso el mundo mos manden livros viejos ke guadraremos para la jenerasyones vinideras.

 

Akodro aki la memoria de Ishak Navon zl. el kual kreo la Rachut Ladino, la kuala ayuda a la sovruardia de muestra kultura i oguro vidas largas a Moshe Shaul a Zelda Ovadia i a un puniado de volontarios en Israel ke purfiaron todas sus vidas a rebivir i mantener muestra lingua biva. No ay duvda ke Rachel Bortnick merese ser dekorada por su immensio lavoro onde todos los amigos de LK son testigos.

Dr. Selim Salti.

 

Share on Facebook
Share on Twitter
Please reload

Bizi Takip Edin
  • Facebook Basic Square
  • Twitter Basic Square
  • Google+ Basic Square
İLETİŞİM

Tel: +972 36582936
Fax: +972 36573894

turkisrael@gmail.com

ADRES

Mohrey Sigariyot 7 Bat Yam - Israel

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon
İletişim ve faaliyetler hakkında bilgi almak için