EL LIBANO


En estos ultimos anyos el vizindado de Israel, troko muncho del punto de vista de amenaza militar, kon la eksepsyon del Libano onde el Hezbollah, emanasyon pura iraniana , konsiderado komo un governo otonomo ariento del payis, es visto komo muy danjorozo. Dingun de los payizes arabos del deredor no se arrezikan a azer la gerra a Israel a la eksepsyon de esta milisya shiita bien organizada al seno del Libano, ke oy en dia representa mizmo una identitad politika achetada por el premier ministro sunitto Saad Hariri i de su aliado maronita( kristyano katoliko) Michel Aoun,prezidente del estado. Las dalkavos gerras ke se izieron en los anyos pasados entre Israel i este payis para aronjar a Arafat i sus fuerzas palestinianas ahuera de eya, enfortesyo la pozisyon israeliana en la rejion ma no enkorajo a los Libanezos a eskabuyirsen de esta milisya shiita terrorista komo se eskabuyeron de los kombatantes palestinianos i de azer la paz kon su vizino del sud.

La gerra sivil ke duro kinze anyos entre los kristianos i los musulmanos , achakes de los palestinianos, kavzo la destruksyon i la fayita ekonomika total del payis. I malgrado los anyos pasados la ekonomia del payis no se remetyo i la povlasyon kedo dezunida. Las lisiones de este konflikto sanglante ayudo a ke las komunidades shiitas, sunnitas, druzas i kristyanas ke kompozan la povlasyon del payis organizen sus propyas milisyas para defendersen entre eyas. Entonses el Iran apoyo a las milisyas shiitas kon armas i muncho dinero i es ansi ke el Hezbollah se izo oy una fuerza politiko/ militar a bastante importante,komo la konosemos.

La menasa de atakar Israel kon un armamiento sofistikado krea seriozas duvdas en el penseryo israeliano i por esta razon Tsahal (la armada israeliana) toma todas sus mesuras para defender el payis. Ultimamente se topo tuneles echos debasho el territorio israeliano kon la intensyon de atakar aryiento del payis i matar lo mas posivle de siviles. Los akordos echos a traverso las Nasyones Unidas ke defende al Libano de deshar las milisyas shiitas de estar a la frontyera kon Israel no son respektados por el Hezbollah i las fuersas de la Finul (fuerzas de la UN) ke sus prezensyas es de empidirlo de aserkarse de las frontieras, sino kolaboran aviertamente , serran los ojoz en los lugares onde se establesyo i lo deshan ovrar. Se entiende ansi ke el Hezbollah no respekta dingun akordo sinyado por el governo Libanezo i se siente libero de komportarse komo le konviene kon el apoyo silensyozo de la otoridad politika del payis.

Este payis ke fue fondado en1943 es una republika de serka de 6 milyones de abitantes(inkluzo los refujiados palestinianos i sirianos) kon una konstitusyon ke rekonose 18 relijiones diferentes i el egzekutivo es kontrolado por los kristyanos (ke elijen el presidente), los sunnitos(ke elijen el primer ministro), los shiitos(ke elijen el prezidente de la kamera), los Druzes i otras minoritades kristiyanas i musulmanas ke votan por 128 miembros de la kamera de deputados. El sistema demografiko del payis no es nunka kontrolado i kontado de espanto de ver una supremasia de una de las kompozantes relijiozas, koza ke kreera bastante danyo al pezo i a la armonía del governo.

La armada de serka de 70000 miembros es flaka i ekipada por lo mas kon armamiento amerikano, su dover es de protejar sus frontieras kon la Siria i Israel, i 240 kilometros de bodre de mar. El Libano, en kestyon de armamiento es el payis ke resive el mas grande ayudo de los Estados Unidos en el Medyo Oriente, despues de Israel. En pasadas esta kestyon fue analizada por los manaderos politikos i militares israelianos, i se formulo duvdas sovre esta asistensia militar ke resive el payis de sedros. Mas de la meta de la armada es entrenada por los amerikanos el kual resivyo armamento muevo de una valor de 2.3 miliardas de dolares dezde 2005 fin a oy en dia. En fortesiendo la armada se penso en el Pentagon, ke eya azera su lavoro para dezarmar el Hezbollah, nada de esto no fue echo komo se penso, al kontraryo el governo Libanezo i la otoridad terrorista se metieron de akordo a kollaborar sozde para la defensia del payis. Se pretende ke mizmo un sierto ekipamento fue emprestado por la armada al Hezbollah el kual elimino a Isis ke se avia infiltrado de la Siria. El Libano ke avia kondanado al tiempo la prezensya en su teritoryo de esta fuerza terrorista, oy de la boka del primer ministro Hariri se oye ke es no solo akseptada ma ke partisipa politikamente al fonksyonamiento del payis. El Hezbollah ansi se infiltra entre los altos kadros de la armada i mira de konkistarla de aryento. Kuando la kestyon fue tratada por la administrasyon amerikana, los responsables del Pentagon pretendieron ke es nesesaryo por la stabilita de la rejion de protejar la armada libaneza i de enfuerteserla para ke el konflikto Siriano no penetre en su teritoryo.

De otra parte, se oye de las otoridades amerikanas ke el governo Libanezo mira de frenar, lo ke puede, a ke el Hezbollah no sea instrumento de un asalto iraniano sovre Israel, porke el rezultado sera , sigun sus konviksyones, la destruksyon total de sus payis .

A mi avizo personal, en estas sirkonstensias los Estados Unidos deven de arestarse de ayudar la armada libaneza la kuala no inche su ovligo komo se deve en metiendo en perikolo Israel i el Libano. Ademas si la armada perye ansi su supremasia , mizma chika en el payis, el puevlo se espertara i mirara kon el ayudo del oksidente i de Israel a eliminar el Hezbollah. No es permetido ke el Iran venga de esta parte del Medyo Oriente. Si insiste deve saver ke el presyo a pagar es muy alto.


0 views
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon