PERSISTENSYA DEL ANTISEMITIZMO EVROPEO


El antisemitizmo evropeo perdura dezde los primeros sieglos del kristianizmo ofisializado por sus tiranos komo relijion del kontinente. Miles de anyos los djudios sufrieron de esta inimista, ke se manifesto komo la kolor del kamaleon , trokando sus akuzasiones sin razon en diferentes maneras trajikas, sovre la konvenensia de los dirijentes i de la epoka.

Por razones de grande inyorensia los puevlos evropeos fueron manipulados por los tiranes, diktatores i mizmo por politikos elijidos i es ansi ke los djudios fueron akuzados de todos los males ke akontesiyan en los payizes en los kualos bivieron i biven. Miles de anyos esta trajedia kontinuo onde el djudio era konsidarado komo parya, sin dingun derecho sivil , sin tierra, apenas si le era permitido de sovrebivir sovre la voluntad del dirijente politiko en poder. Bien entendido las malas palabras, los insultos, la manera de serrar en getos los djudios se enkulko en la memoria del evropeo i en los ultimos dos siglos a kavza de la influenza de la klasa medya edukada, antisemita por lo mas, malgrado las revolusyones sosyalas progresistas i el establisimiento de estados nasyonales kon siertas ideas de demokrasia, el djudio ke avia apenas avierto el ojo en resiviyendo komo sivdadino de sigunda zona siertos derechos , fue masakrado por eya sin razon en pogromes en la Evropa del este i ultimamente en la Shoa organizada por el rejimen nazista de Hitler.

Es ansi ke la nasyon djudia biviendo en el kontinente i en los Estados Unidos onde se egzilo en grande kantidad, malgrado todas las difikultades i grasias a su fuerza interna de resistir a todo modo de akuzasyon sin razon ma de no pueder organizar su defensya, dezvelopo en su seno elementos de sensia ke dieron a la umanidad en diversos kampos de la teknolojia, de las sensias positivas i de la politika, personas famozas ke transformaron la manera de vida en la sosiedad moderna oksidentala kon buto de mijorear la egzistensia del djudio. Este fenomeno fue la kontinuasyon de lo ke fue dezvelopado por los savyos djudios de la antikidad ke mos ambezaron a ser unidos i atados a la Tora, pilar de muestro atadijo a la tierra santa.

El aborresimyento kreado por el evenimiento Dreyfus dio ideas a djudios laikos de la epoka, de solusyonar el problem del antisemitizmo en mirando de krear una patria mueva en tierra de Kanaan i ansi aresentar los djudos en sus tierras ansestralas. Herzl dezvelopo la idea i fue el fondador prensipal del sionizmo. Istorikamente avlando esta idea izo su kamino i Israel fue fondado kon gerras konsekutivas lo ke kreo un muevo antisemitizmo en el mundo arabo muzulmano ke se adjunto al antisemitizmo visyozo del oksidente.

El sionizmo se espandyo en el mundo i Israel grasias a las olas de imigrasyon oy tiene serka de siete milyones de sivdadinos djudios ke fraguaron un payis fuerte , unido, solidaryo i riko. Ma en realita enfrente de este fakto, los antisemitas sustenidores del antisemitizmo, debasho la kacha de kritikar la politika del estado israeliano, akuzandolo de okupar tierras arabas ,kontinuan sin falta kon argumentos klasikos antisemites sus peligros. Estos argumentos malgrado el tiempo ke kambya kedan siempre los mizmos.

Munchos payizes en el oksidente i mizmo en el lechano oriente para remediar a este fenomeno del antisemitizmo muevo, votaron leyes en sus parlamentos demokratikos para kastigar las akuzasyones sin fey i ley i los atentados sovre djudios deskonosidos, sin kulpa, ke fueron atakados fizikamente i matados por la sola razon de ser djudios. Enfrente de las penas ke los puedra kastigar severmente, los antisemitas trokaron sus diskorsos de tomarse kontra el judaizmo i ampesaron dezde pokos anyos a atakarse a Israel. Muevamente en Fransya, el governo por esta razon mira de trokar las leyes antisemitas i ajustar a eyas los klishes del diskorso malo sovre la kritika de Israel.

Todas estas mezuras juridikas i politikas malorozamente no abastaran a un buen modo de kortar los raises del anisemitizmo en una korta perioda. El nesesita una lucha a bastante larga i una edukasyon ancha de la povlasyon en jeneral. Komo los sentimientos malos mizmo todo en siendo pensados i no pronunsiados en publiko deven ser kombatidos dia por dia por la eskola, la universitad, la media eskrita i visual ke deven partisipar al esforso de lucha kontra este fenomeno . La inyoransia del sujeto ayuda a siertos klishes de malisia i inimista a ke se graven en las konsiensias umanas sovre todo las kristianas i muzulmanas. El governo israeliano de su parte, devra azer todo lo ke esta en su poder para dezvelopar ideas i modos i grasias a la teknolojia de la memorya artifisyala empajarlos al mundo entero. Savemos ke fin oy en dia no se izo investigasyones bastantes grandes sovre el sujeto i lo poko ke se izo no resivyo la importansia ke se devia darle. Es alarmante de sintir ke la djudeofobia esta trokando su forma en inimistad de Israel el símbolo de la vitalidad de la egzistensia del djudaizmo. Egzistensia ke se kritika por lideres komo Jeremy Corbyn, Recep Tayyip Erdogan, Mahmut Abbas los kualos gumitan sus akuzasyones falsas i ke pretenden ke Israel es una kreasyon kolonyala sin dinguna kredibilita.

A mi avizo no abasta de kritikar los nazistas de basho nivel , los islamistas o BDS, ma kada uno de mozotros si kereriamos luchar seriozamente kontra esta mueva kalamitad devemos saver ke el diskorso de inimista es una forma de violensia mentala ke se transforma potensialmente en violensa fizika i dunke aparejarmos en konsekuensia.

Tene en tino ke la djudeofobia no solo pushara la destruksyon del djudio ma en mizmo tiempo la de la demokrasiya.


47 views
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon