LOS MOALIM DE CURAÇAO


En segito al dekreto de la Ekspulsion de 1492, los djudios de Espanya duvieron eskojer entre 2 alternativas; konvertirsen a la relijion kristiana o salir al exilo, deshando detras de eyos sus kazas, magazenes i todo el fruto de sus lavoros de largos anyos, i sin saver komo serian resividos en los lugares onde yegarian.

Aun ke savian bien las sufriensas ke los asperavan, diezenas de miles de estos djudios eskojeron en kamino del exilo, en tal de no renunsiar a sus relijion; ma uvo munchos tambien ke eskojeron la otra alternaativa, la konversion, afin de despartirsen de sus kazas i otros bienes, ansi ke de sus amigos i parientes, algunos de los kualos ya se avian konvertido de antes.

Djuntos kon esto, munchos de los ke se konvertieron, izieron esto por la fuersa, i no porke estavan konvensidos ke la relijion kristoana era la mas djusta; i todo en komportandosen komo kristiaaos en sus relassiones kon la povlasion kristiana, adientro de sus kazas eyos kontinuavan a kumplir los mandamientos de la Tora, oa lo menos los ke pudian ser kumpldos sin meter en peeligro sus vidas i las de sus famiya.

Kon el tiempo, algunos de estos konversos reusheron a salir de Espanya i Portugal i retornar al djudaizmo, emigrando a paizes komo Flandres (oy Beljika), Holanda, Italia, paizes del Imperio Otomano o mizmo a las Amerikas.

Uno de los sentros en Amerika onde los konversos tornaron aviertamente al djudaizmo es la izla de Curaçao, a la kuala yegavan tambien kristianos-muevos de diversas partes del kontinente amerikano, para azer sus Brit Mila (sirkunsizion). No es sorprendiente entonses ke en la segunda metad del siglo XVIII avia en Curaçao, en una komunidad ke kontava menos de 2000 almas, a lo menos siete personas, kon el titutolo de Moel Muvhak, ke azian sirkunsiziones. El moel era una figura importante en la komunidad i jeneralmente el dava sus servisios debaldes, komo mitsva. Si avia gastes eyos eran pagados por la komunidad.

Los lideres relijiozos de los djudios de Curaçao tenian una aktitud espesiala enverso los konversos. Munchos de estos lideres eran eyos mizmos konversos ke tornaron al djudaizmo. El haham (rabi) Eliyau Lopez ke nasio en Malaga en 1648, arivo de Amsterdam en 1693 para servir komo haham de los djudios de Curaçao. El haham Samuel Mendes de Sola nasio en Lisbon en 1699 i vino a Curaçao en 1741.

Los dos izieron todo sus posible para fasilitar el retorno al djudaizmo de los konversos ke yegavan a Curaçao. Sus nombres no eran publikados, espesialmente kuando se tratava de konversos ke tenian pozisiones en la iglesia katolika, ma ya se save djuntos kon esto ke entre los ke yegaron a Curaçao para rekonvertirsen al djudaizmo uvo un prete katoliko, un padre fransiskano i un dominikano.

No se save el numero exakto de los konversos ke tornaron a ser djudios en Curacao. Ma podemos tener una idea en baza de los rejistros de algunos moalim ke fueron topados i estudiados por el haham Isaac Emmanuel de Curaçao.

De estos rejistros sale ke entre los anyos 1720 asta 1731 eyos izieron mas d 50 sirkunsiziones entre otras, a personas de mas de 70 anyos, komo Ishac Henriques Fereira i Abraham Fernandes, ke malgrado sus edad avansada tomaron el risko de azer esta operasion en tal de tornar yenamente al djudaizmo.

Esto mos permete de azer una evaluasion de kual podia ser el numero total de los konversos ke izieron sus sirkunsizion en Curacao, si teniamos los rejistros de todos los moalim ke fueron aktivos en esta izla durante un periodo de 150 anyos a lo menos.

Un grave insidente afito en 1718 kuando el konverso Abraham Campanal de Newport, Rhodes Island, murio despues de su sirkunsizion, probablamente de infeksion. Komo konsekuensa de esto, durante un sierto periodo no fue permetido a la komunidad djudia de sirkunsir kristianos (los konversos eran konsiderados kristianos asta ke se rekonvertian ofisialmente al djudaizmo).

Malgrado este insidente los konversos no se deskorajaron i eyos kontinuaron a arivar a Curaçao para sus sirkunsizion. La ultima sirkunsizion notada en el rejistro de un moel fue la de un sierto Fonseca ke arivo de Portugal en 1822.

Los djudios de Curaçao tenian buenas relasiones komersiales kon las kolonias espanyolas en Amerika del Sud i del Sentro. Esto era konsiderado legal por los olandezes ma illegal por los espanyoles; i a vezes, naves ke sus patrones o ekipajes eran djudios, eran aferradas por los espanyoles ke yevavan los djudios a Cartagena, Colombia, o a Espanya para ser djuzgados. Los ke avian nasido komo djudios podian ser areskavdados kontra pagamiento, jeneralmente por las komunidades de Gibraltar, Bayonne, Bordeaux, Amsterdam o Curaçao. De otra parte los konversos ke avian tornado al djudaizmo eran entregados a la Inkizision ke los duzgava i kastigava duramente.

Komo mizura preventiva, los marineros djudios i konversos konvensieron a los governadores ‘holandezes de Curaçao de darles sertifikados segun los kualos avrian nasido en Curaçao i no Espanya o Portugal. Los moalim de sus parte les davan dokumentos ke avian nasido komo djudios i avian sido sirkunsidos poko despues de sus nasimiento.

Todo esto rende ainda mas difisil i komplikado el estudio ke permeteria de fiksar el numero de los konversos ke tornaron al djudaizmo; ma el fakto es ke uvo un muvimiento kontinual de konversos ke, asta la metad del siglo XIX, partieron de Espanya i Portugal a diferentes partes del mundo para rekonvertirsen i uno de los sentros de sus retorno al djudaizmo fue Curaçao.


0 views
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon