MOSHE SHAUL PILAR DEL SEFARADIZMO


Kuando muestra lingua i su kultura estava para despareser, kuando los ladino avlantes en sus dalkavos jenerasyones se detuvieron de praktikar el idioma, komo una luz del firmamento aparese Moshe Shaul, muestro grande maestro ke peno toda su vida a salvarlas i revitalizarlas de manera de darles mas fuerzas . Sin regreto el se dediko noche i dia a este lavoro i oy a sus serka noventa anyos todo en pensando ke se deve azer mas esforsos para la kultura, el savorea su reuchita de aver kreado un mundo muevo kon miles de partisipantes ke kontribuen sin falta al dezvelopamiento de la kultura sefaradí. Fui uno de los ke lo sigieron i es ansina ke fondi i desvelopi el Instituto SALTI en la Universitad Bar Ilan. Parami Moshe no solo es un ermano grande i amigo de munchos anyos, es en mismo tiempo uno de mis pokos konsejeros favoritos .

“Moshon” komo lo yamo yo, es nasido en 1929 i kresido en Izmir, en una famia sionista. Izo sus estudios en diferentes eskolas i se ambezo el Italiano, el Fransez i el Turko en despartes de su lingua materna el judeo espanyol. Frekuento el muvimiento sionisto Neemane Tsion onde se ambezo los prensipios del ebreo, i lavoro los fines de semana en la tierra aziendo ‘ahshara’ en un chiftlik(granja) serka de Izmir. A su torno poko dospues el se izo madrih i formo mansevos kandidatos a la aliya. En Enero 1949 yego a Israel komo ole fue a bivir al kibutz Palmah Tsuba ke avia sido fondado en partida por mansevos djudios de Turkia,entre los kualos de topava su ermano bohor ke avia yegado a Israel antes de el. .Malgrado ke se sintia bien el salio del kibutz para ir ayudar a sus parientes ke avian echo aliya i ke se establisieron en Haifa. Moshe paso un tiempo ayi en lavorando i ayudando a sus parientes. Moshe se enlisto a la armada i kuando eskapo torno a Haifa para lavorar i ganar su vida. En 1954 ampeso a estudiar en la Universitad Ebrea, sosiolojia i sensias politikas. Durante los estudios fue achetado komo redaktor de las nuvelas en ladino por Kol Israel sin difikulta i ansina se le avrio la puerta a una profesyon a la kuala nunka no avia sonyado antes. Ampeso un lavoro ke le izo konoser la ermozura de la lingua i la rikeza de su erensia istorika i kulturala. Ansina tuvo el koraje de luchar para la kontinuidad del idioma malgrado la eskuras previsiones ke dominavan entonces, ke esta lingua ya no tenia ke pokos anyos solo de vida i ke en serka tiempo, mismo la emisión de ladino seria serrada por falta de oyentes. Es ayi ke seizo amigo de Yitshak Levi ,su maestro en la Radio i de Yitshak Navon kon los kualos lavoro toda su vida profesional. No solo la emisión radiofonika kontinuyo i kontinuya dainda , sino ke eya enflorese mas i mas. Ademas Moshe ajusto a su actividad radiofonika dos importantes proyektos:” el proyekto folklor ladino”, en el kuadro del kual arekojieron serka de 2800 kantes, miles de refranes i numerozos kuentos de muestro folklor i la revista “Aki Yerushalayim”, la unika en el mundo asta la aparision de la revista El Amaneser, a ser publikada enteramente en ladino. Eya fue también publikada kon un método de eskrituria (la grafia de Aki Yerushalayim) ke Moshe dezvelopo i ke kon el tiempo fue akseptada por la mayoría de los sefaradís ke son ainda aktivos en el kampo de la kreasion jurnalistika i literaria en esta lingua. Kol Israel en ladino gano no solo en Israel ma en el mundo una fama bastante grande i fue primado una ves en 1980 i una otra en 1985 por las institusiones espagnolas. Ademas Moshe paralelmente a su lavoro de redaktor kreo en 1981 djuntos kon sus kolaboradores de Kol Israel la Asosiasion Sefarad, para la konservasion i promosion de la kultura djudeo española. La primera ke se fondo en Israel para enkontros entre ladinoavlantes, ke ampesaron a praktikar la lingua entre eyos i también dokumentar los diversos aspektos de muestro folklor:kantes, kuentos,refranes,uzos i kostumbres i mas. En Yerushalayim uvo tiempo onde mas de200 personas asistieron a estos enkontros. Yerushalayim fue i será siempre la kapitala del sefaradizmo en el mundo.

Moshe no se kanso durante munchos anyos de viajar sea en Israel sea en el mundo i espesialmente en Espanya, sin tener dingun titro ofisial, para dar konferensias i partisipar a kongresos onde uvo un intereso verso el ladino. El iso esforsos para salvar muestra erensia del olvido durante 40 anyos i a la fin en 1994 yegando a la edad de 65 anyos salyo a la pensia. Ma esto no keria dizir arestarse en su kampo de lavoro. Ampesando en 1994, juntos kon Yitshak Navon de bindicha memoria, fina 1997 lucho para ke la ley propozada por MK Shilansky sea votada por la Keneset para la kreasion de la Autoridad Nasionala del Ladino. Parviniendo a tener esta enstitusion kapitalizada por el Estado, Moshe fue nomado al lado del prezidente Navon komo visepresidente. Kon la partisipasion de Aaron Kohen, de bindicha memoria, komo direktor i otros miembros del komite egzekutivo se ampeso una seria de proyektos ke ensuflaron una mueva vida en todo lo ke toka el ladino. Fue konvokado un kongreso internasional, en el kual la grafia de Aki Yerushalayim fue rekonosida komo el método sigun el kual kale eskrivir el ladino. Durante anyos La Autoridad dio apoyo a proyectos ambisiozos del Instituto Ben Zvi i de la Biblioteka Nasionala,fueron dadas subvansiones a la las universitades del paiz, a los sirkolos de kultura djudeoespanyola. Oydia ya ay 15 tales sirkolos ke son aktivos de Haifa en el norte asta Beer Sheva en el sud. En despartes de su okupasion de kada dia, el ensenyo el idioma en la Universidad de Beer Sheva i en el liseo Amalia en Yerushalayim.

Moche en el anyo 2015 sovre la nominasyon de un muevo konsejo publiko de la Autoridad en el kual no fue eskojido, izo su ‘referans’ dospues de servir 18 anyos komo visepresidente de la institusion i dechar a otros la kontinuasion de la lucha para el futuro del ladino i su kultura. Su lavoro nunka será alvidado, la prova es ke siendo apresiado, el resivio la dekorasion de Komandante de la Orden del Merito Sivil Espanyol i fue nominado komo miembro korespondiente de la Real Akademia Espanyola i enfin poko tiempo antes resivio un premio por la ovra de su vida ke le fue otorgado por la Autoridad Nasionala del Ladino.

Moshe kazado kon Ruth Davidov tuvieron dos ijas. Tali i Mihal kon 3 inyetas i un inyieto.El fue un buen marido, un buen padre i un verdaredo yerushalmi. Le oguro vidas largas yenas de sanedad i komo amigo en el kampo de muestra kultura le digo un grande GRASIAS por lo ke izo en su vida.


0 views
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon