El KALENDARIO


En estos dias termina el anyo 2017 y empesa el anyo 2018. Kuaje todo el mundo fiesta esta data del 31 Desiembre y se auguran (Happy New Year-Yeni yiliniz kutlu olsun- Bonne et heureuse annee) etc. Kuando mozotros Judios fiestimos el anyo nuevo en Rosh Hashana kon augurios de Shana Tova, la tadre del 20 Sept. 2017.

Aze 15 anyos, kon la inisyativa del Dr. Avner Sciaky z.l se aksepto por la Kneset el ovligo de uzar la data Ebrea juntos kon la data Gregoriana sovre todos los documentos ofisiales o juridikos en Israel. Ma munchas aktividades en Israel empesan el 1 de Enero y terminan el 31 Desiembre, ansi ke el empesijo del anyo según el kalendar Gregoriano tiene grande importansa, tanbien en Israel. Una grande partda del puevlo lo fiesta, sin ke se olvide ke para el Judio, el anyo enpesa el 1 del mes Tishrei, en Rosh Hashana.

Bien entendido ke esta diferensia viene de los sistemas diferentes de kalendaryos. El kalendario permete de mesurar y de eskrivir el paso del tiempo. Su orijen etimolojika es del latin calendarium . El kalendario divisa el tiempo en unidades : anyos, meses, semanas y días, y permete de yevar un orden kronolojiko de actividades y organizar un agenda.

Ekzisten diversos tipos de kalendarios ke diferan uno del otro sovre komo se divisa el tiempo. En el mundo oksidental, el kalendario el mas empleado es el kalendario Gregoriano, ke empesa el 1 de Enero y se termina el 31 de Disiembre. Este es un kalendario solar ke fue imposado por el Papa Gregorio XIII en el anyo 1582 de la Era Kristyana, i ke se impozo a progresivamente una grande partida del mundo para uzo de evenimyentos siviles. Antes de este kalendario, en el mundo Kristyano empleava el kalendario Juliano desde el imperio Romano. La división en meses es la mezma, La diferensia es en la determinasyon de los anyos bisekstilas ( ke kontan 366 diyas),

El Kalendario Gregoriano divisa el anyo en 12 mezes, kada uno entre 28 y 31 dia según el kavzo, es bazado solamente en el siklo solar anual, kuando el kalendario Musulmano desde Muhammed es puramente lunar.

Otros kalendarios son el kalendario Judio (Hebreo), y el kalendario Chino. Estos se bazan sovre bazas astronomikas diferentes

El Kalendario Judio fue konkluido por el savyo Hillel II (presidente del Sanhedrin) en el anyo 359 de la era Kristyana, se baza sovre un alegoritmo komplekso ke permete de pre-dizir las datas aproksimativas de la luna nueva, las datas de las fiestas, kon kalkulos matematikos y astronomikos ke tomaron en kuenta las observasiones de los tiempos pasados. Este kalendario es luni-solar, kere dizir ke se baza tanto en el siklo de la tierra al deredor del sol (anyo), komo el de la luna al rodeyar la tierra ( un mez)

En su konsepsion solar y lunar, el kalendario Judio se asmeja al Chino, ma no se save kual es el ke influyo sovre el otro.

El kalendario Judio ( o Hebreo) empesa kon la kreasion del mundo (Bereshit, Genesis) ke akontesyo, según la tradisyon Judia, el dia de Alhad (Yom Rishon) el 7 de Oktubre sel anyo 3760 ( antes de la era kristyana). Esta data es el 1 de Tishrei del anyo 1. De esta manera el anyo Gregoriano de 2018 es ekuivalente al anyo 5778 (ke empeso el 20 Sept. 2017 a la tadre y va terminar el 9 Sept.2018 a la tarde)

El kalendar Gregoriano empeso a kontar los anyos kon el nasimiento (milat) de su profeta Jesus (Yeoshua oYeshu, o Isa). Ansi es ke kuando se avla de un sierto anyo se uzan (A.D en latin Annus Dei, en Turko M.Ö-M.S).

Aze 15 anyos, kon la inisyativa del Dr. Avner Sciaky z.l se aksepto por la Kneset el ovligo de uzar la data Ebrea juntos kon la data Gregoriana sovre todos los documentos ofisiales o juridikos en Israel.

Akodrar días importantes aze siempre bien a la persona : el lo fiesta, se repoza, se akodra etc. Poko importa kual es el kalendario, ma para mozotros Judios, ke somos un puevlo ke tiene su proprio kalendario, su propia historia y kreensa, no podemos abandonar nuestro kalendario Ebreo. No ay ningún mal de fiestar seyga el 31 Desiembre, komo el 1 de Tishrei- Rosh Hashana.

Ke tengamos siempre anyada buena, paz, salud y vida kon parnasa y sin mankura de ningunos.

=====================================================================

Fuentes:

https://www.wikiwand.com/fr/Calendrier_gr%C3%A9gorien

https://www.wikiwand.com/es/Calendario_hebreo

http://www.jewfaq.org/calendar.htm

https://www.wikiwand.com/en/Hillel_II

http://www.ladaat.info/article.aspx?artid=2996

#ladino #sefarad

26 views
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon