ESTAMBOL SIVDAD ANDE NASI (3)


La minorita mas grande de Estambol era la grega. La armena vinia en sigundo i la djudia la tresera. En despartes bivian en Estambol los levantenes—una meskla de italianos, fransezes,austriakos búlgaros, hongaros, kristianos oryantales kon los gregos de Estambol-,-ke se amenguaron al prensipio de los anios 1960. Avia en mismo tiempo una komunita Karaita,donde los miembros se apokaron muy muncho oy en dia. Dizde del dizmueven sieglo se establisieron djudios de la Evropa oriental ke se gruparon en forma de komunidad ashkenazi, ke fue yamada ‘la komunidad de los lehlis’ , porke los djudios otoktones los konsideravan komo djudios polonezos, todo en no siendo en parte de esta orijin. Esta komunidad grasias a las Kapitulasiones Otomanas, dadas a las nasyones evropeas, se dezvelopo muy presto i komo sus miembros no pagavan dasios teniendo suditansia etranjera ,se enrikesio en kurto tiempo. Ansina los lehlis tuvieron una grande influenza al seno de la prinsipala komunidad de Estambol. Kon el tiempo esto kreo una inimista entre los sefarades i ashkenazes los kualos se sintian superiores a eyos. Durante los otomanos los djudios no fueron governadores o ministros komo los gregos o armenos del imperio, ma por kontra los mijores medikos, industriales, sovre todo en tekstil i armamento, sin kontarvos el nivel de saverisyo ke tenían. Munchos fonksionarios de alto nivel eran djudios i esto kontinuo fin el establisiamento de la republika ke se fondo i se dezvelopo en la primera parte del ventien sieglo. Kon la fondasion de la republika turka los djudios perieron el statuto de nasion i se izieron sivdadinos turkos (!) de relijion ebraika. Fin a oy en dia este statuto kontinua i sus nombres aktuales no depasan kinzemil personas. . Al prensipio del sieglo vente la povlasion judía de la sivdad era kaji de sinkuentaisinko mil personas. Kon la fondasion del estado de Israel una grande parte de esta komunidad imigro verso de el o se egzilo entremientes a diferentes partes del mundo sovre todo a los Estados Unidos i a la Amerika del sud. Durante la Sigunda Guerra Mondiala los djudios de Turkia se salvaron de la deportasion grasias a la notralidad del paiz, ma por kontra fueron sujetos a munchas diskriminasiones rasistas i antisemitas de la parte del rejimen diktatorial de akel tiempo. El egzilo forsado de las sivdades de la Trakia, las vente klasas de djudios ke fueron yamadas a ser soldados esklavos mos decho un rekordo muy amargo en muestra konsensia. Ademas durante el dasyo uniko VARLIK kaji la mayoriya de judíos i personalmente yo, vimos komo arbitrariamente el pueder politiko enkorajo ke los bienes de muestras famias sean arevatados por los sivdadinos muzulmanos a kaji debaldes.

Malgrado todo la vida kontinuo i poko tiempo dospues de la Sigunda Guerra Mondiala, la Komunita se adapto a diferentes i muevas kondisiones de vida , se enrikesio en parte grasias al komerso internasional, infortesio sus institusiones i se dezvelopo muncho mas malgrado la piedrita de la meata de sus miembros. Aktualamente visto el antisemitismo i la asimilasion pujada, la apartenensia al djudaizmo se aflaka de dia en dia, la lingua de los padres EL LADINO ya no es mas uzada por la manseves. La lingua turka ke mos fue impozada por fuerza fue una de las razones del dezvelopamiento de una mueva kultura laika al seno de los djudios. La praktika de la relijion kayo al treser rango i el atadijo a las tradisiones desparesen poko a poko, es ansina ke los kazamientos mikstos kada dia pujan mas. Malorozamente oy esta difisil de topar minyan en las antikas sinagogas de Balat, Sirkeci, Bakirkoy i Kuskuncuk. Ademas malgrado la pseudo demokrasia egzistente los djudios son sivdadinos de sigunda klasa. Las fonksiones publikas para los djudios se limitan a ser profesor en universidad, doktor en hospital, o abogado en el baro. Eyos no se keshan de sus estados i el prensipio de kayades es sakro. Les parese ke son sin solombra entre los ochentamiliones de muzulmanos. Se puede pretender ke en muestro sieglo esta komunidad vieja de miles de anios se diritera kon el tiempo fin a despareser enteramente.

Keridos lektores de mi parte digo decharemos kon deskudio por un momento todo esto ke vos konti i permeteme de akodrarme en kontandovos un es.huenyo miyo.

¨ Me veygo a mi chika edad,kon pantalón kurto, asentado serka la meza de tavla en la guerta de la kaza de Prinkipo, komiendo mi revanada de pan tostada, untada ke kezo blanko i asugar por en sima,beviendo el te ke me traiva unas de mis tias o mi kerida madre. Mirando de lechos las izlas de Halki i Proti en respirando el ayre fresko en akel dia kalyente de enverano, ke me dava es.huenyo dospues del dezayuno. Tenia el grande plazer de espandirme en la kuna ke me avian echo entre los dos arvoles grandes de la guerta. Agora anios dospues otruna ves serro los ojos avagar avagar i me meto a sintirte Estambol. Pensando a mi vida pasada , a mis amores, a mis anios de estudio i de lavoro duro, a mis munchisimos amigos, a los momentos orozos i tristes de mi egzistensia en ti. Te oygo komo la muzika de las olas ke tokan tus bodres de mar, te siento ke me dizes KOMO MI NO AY SIGUNDA.

#ladino #sefarad #yahudi

0 views
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon