ESTAMBOL SIVDAD ANDE NASI (2)


Kuando nasi en la primera metad del sieglo pasado, Estambol tenia solo dos miliones de abitantes , oy tiene serka diezimueve miliones. Eya no fue pensada ni strukturada para una povlasion tan grande. Por esto, komo kada megapolis del mundo esta malorozamente hazina del punto de vista ekolojiko,yena de polusion. Malgrado todos los esforsos echos por la munisipalitad i sus dirijentes , no se puede dizir ke se toparon remedios konkretos a los problemes de sirkulasion i de transporto,a las kanalizasyones, a la limpieza del Halich i de la mar Marmara, un tiempo yena de pishkados, pekado ke oy en dia no keda ke muy poko komestible. La erensia ke desharán los moradores de oy a las jenerasyones vinideras no va ser akeya ke resivimos. El mundo se kayenta, Estambol buye, disho un amigo ekolojista .

Estambol bastante diferente de otras megapolis, se puede dizir ke es una akumulasion de munchas sivdades ke se ajuntaron kon el tiempo entre eyas. Los principales foburgos viejos kedaron chikos en kuantitad de moradores verso los foburgos muevos , kreados en los dalkavos trenta anios. Miliones de kazalinos fuyendo la provedad i el konflikto kurdo en Anatolia del sud, vinieron a establisirse a Estambol, a el ‘DUKA” komo los politikos de la siedra la yaman. Eya es la sivdad la mas rika de los Balkanes. Trenta i sinko por sien de la industria turka se topa ariento de eya i a su doredor. Estambol es el sentro finansiario del paiz i lo mas de los muy rikos biven en los yalis fraguados al bodre de las dos partes del Bosfor .Estas fruagas antikas se venden oy a miliones de dólares. No estare a dizirvos el nombre de livros i publikasiones ke fueron eskritas sovre esta sivdad. Ademas mozotros los nasidos de Estambol podemos kontar a su sujeto oras enteras sin artarmos i por esto aki kero konsentrarme sovre la vida djudia.

En el tiempo del Imperio Romano se renkontra en Estambol a los ‘frankos’. Los frankos son los djudios ke vinieron a establisirse en siertas sivdades importantes del Imperio dospues ke Israel fue konkistado por los Romanos. Eyos fueron yamados frankos por ke eran los solos a tener un permiso de viajar i establisirse ariento del Imperio, favor ke no se dava a los pueblos konkistos o sometidos. Durante el periodo del kristianizmo oriental, el reynado Bizantino permitio a ke estos djudios kontinuan a bivir en Estambol. Eyos esta vez fueron yamados Romaniotes,avlavan el grego al lugar del ebreo. La fin de eyos vino kuando en el disetien sieglo dospues ke los kuartieres ande bivian en Estambol se kemaron. I ansina fueron forsados de adjuntarsen kon los sefarades ke bivian en los foburgos de Eminonu, Balat , Haskoy i otros lugares. Los romaniotes no konsideravan los djudios espanioles komo djudios puros, si no ke konversos i por esta razon no se mesklaron kon eyos durante un sieglo. Por mo del ‘surgun’, metoda del imperio musulmano de forsar a las minoridades i mizmo a los musulmanos de vinir a morar en Estambol, la prezensia djudia fue siempre grande i importante en la sivdad. La vinida de los sefarades troko la situasion sosyala de la povlasion djudia ,los kuales nombrozos fueron establisidos en los foburgos de Eminonu, Balat, Haskoy, Galata,Pera, Orakoy i Kuzkuncuk. De estos lugares los djudios durante sieglos se fueron de un lugar al otro, sigiendo la moda de bivir de las minoridades de la sivdad. En el dizmueven sieglo Galata i Pera eran en vog, por kontra en el vintien sieglo los foburgos de Sisli, Machka, Kurtulush, Mecidiyekoy i del otro lado del Bosfor Haydarpasha , Kadikoy, Moda i mas otras partes fueron eskojidas por los djudios.

La nasion djudia fue siempre konsiderada amiga del reynado, porke eya no tuvo dingun konflikto territorial, komo las otras minoritades balkanikas, arabas o armenas. Dizde el kinzen fina el diziochen sieglo los djudios fueron orozos i mazalozos de bivir en el oriente, ma las kozas trokan en los 3 dalkavos sieglos onde kon el aflakamento del Imperio turko, la minoridad djudia se atrazo de punto de vista sosyala i kayo en una grande provedad. Orozamente ke personas komo Avram Kamondo miraron de salvarla de su situasion kritika. Eyos ovraron por su emansipasion i kon la venida de las eskolas de la Alliansa Israelita los djudios resivieron una edukasion moderna metiéndose a avlar el franses la lingua franka de akeyos tiempos. Grasias a esto eyos tomaron la kultura evropea moderna antes de los otros otoktones otomanos.

A la semana ke viene kontinuare a kontarvos mas.

Al vermos.

#ladino #sefarad

93 views
İLETİŞİM/ליצירת קשר
ADRES/כתובת 
İletişim ve faaliyetler hakkında bilgi almak için

לקבלת מידע אודות פעילויות ההתאחדות

לרישום / אימייל

 

Tel: +972 36582936
Fax: +972 36573894

+972 36582936:טל

   +972 36573894:פקס

turkisrael@gmail.com

Mohrey Sigariyot 7 Bat Yam - Israel

רחוב מוכרי הסיגריות 7 בתים, ישראל

  • Facebook Social Icon
  • Instagram Social Icon
  • Google Places Social Icon
  • Twitter Social Icon
  • YouTube Social  Icon